Pakistan-a India palaiin Islamabad-a Indian High Commission-a Inrinni zana Iftar party a buatsaiha a mi sawm eng emaw zat chu Pakistan-a venhim hna thawktuten party buatsaihna hmun lut thei lovin a dang a, he thil avang hian India a lawm lo hle.
Indian High Commissioner Ajay Bisaria hian kum tina tih dang angin Serena Hotel-ah party hi buatsaihin Pakistan hmun hrang hranga mite sawm an ni a. Party neih dawnah hian hotel hi nasa lehzuala venhimna pek a ni.
He party-a tel chanchinbu mi pakhat chuan uluk taka an lo endik thu leh sawmna lehkha (invitation card) leh an nihna tilang thei (identity document) nei chauh an luhtir niin a sawi.
Chanchinbu mi dang pakhat chuan hetianga zawhna a dawn dawn sa avangin a kal lo niin a sawi ve thung a. Mi thenkhat chuan an hriat ngai loh hnen atanga phone-a kal lo tura ti an awm avangin an kal lo niin a sawi bawk.
Pakistan People’s Party hruaitu hlun pakhat, Farhatullah Babar pawhin hotel-ah hian a luh theih loh thu a sawi a. “Serena Hotel hi an lo veng uluk hle a, iftar chu thulh niin an lo sawi a. Ringhlelin gate dang ka zawng a, an lo khar a, gate pui lam lah chu an lo veng uluk nasa si,” tiin a thil tawn chu Twitter-ah a tar lang.
Party-ah hian High Commissioner Bisaria chuan kalkhawmte hmaah an mi sawm thenkhat an tel theih loh thu a sawi a, “Buaina in tawh avangin pawi ka ti a, kan thian thenkhatte phei chu an lo tel thei lo a ni,” a ti.