Inrinni khan CLS Academy, Nursery Veng-in YMA Auditorium, Vaivakawn-ah kumina an zirlai HSLC pass tharte lawmpuina hun an hmang a, Aizawl West III bialtu MLA VL Zaithanzama’n a telpui.
Aizawl West III bialtu MLA chuan, “Ram changkang leh hmasawn a piangin zirna an ngaipawimawh a, hmasawnna bul chu zirna a nih avangin nasa leh zuala zirna kan luhchilh a ngai a ni,” a ti a. “Lehkhathiam theite chauh hi mihlawhtling an ni lova, mi taima leh tumruh, mi te aia nasa taka bei thinte hian hlawhtlinna tlang an lawn chhuak zawk thin” a ti.
VL Zaithanzama chuan “Tunlaiah social media a chakin kan hmang nasa em em a, mitinin smart phone kan hum tawh avangin duh duh kan hmetchhuakin kan hre thei tawh a. Mahse, hei hian zirnaah min pui em em lova, kan zirlai thiam taka zirchhuah hian hlawhtlinna min pe zawk dawn a ni” a ti a. “Mahni tan lehkha kan zir anga, chhungkaw tan kan zir bawk a, ram tihmingtha turin lehkha kan zir bawk ang. Chutiang rilru pu tur chuan ka fuih duh che u a, lehkha in zir chhoh zelna turah ram tana chhenfakawm leh hlawhtling in nih ngei theih nan duhsakna ka hlan a che u” a ti bawk.
CLS Academy hian kumin HSLC result chhuakah distinction mi 25, 1st Division 25 leh 2nd Division 1 neiin zirlai 51-ten an pass vek a. Kumin hi an school dintirh atanga an result chhiat ber tum niin, kum 2021 atanga 2023, kum thum chhung an zirlaite HSLC-ah distiction-ah an pass tir vek thei a ni.