BJP party chuan an State Office, Upper Republic ah nimin khan karthar Inhlanna leh Political Session hun neih niin, inkhawm hi K. Vanlalruati, State Executive Member-in inkhawm a kaihruaia, C Laldawngliana, Ex Freedom Fighter Member-in Hunserh hmangin Vanlalhmuaka, State President in thusawina hun a nei bawk.
Vanlalhmuaka chuan, “Kum 2024 MP General Election Result puan hun chu 4th June hi a lo ni ta reng mai a, BJP chuan a hma aia chak zawkin hnehna Pathian leh mipui zarah kan chang leh ngei dawn a, India ram hmasawnna tur atana thawk turin India ram mipuiin kan kovah favah min la kawl tir tur hi a lawm awm hle a ni,” a ti.
Hmuaka chuan, “Mizoram ah BJP-in Sorkarna la chang rih lo mah ila, Sorkarna tak tak ah erawh kan tel tih hi BJP Member te’n kan hriat nawn a ngai a, State Sorkar leh Central Sorkar 5ha taka a kal kawp a nih loh chuan tum ram a thlen theih lohva, chuvangin State ah Opposition ni mah ila Central Rulling kan nih avangin kan pawimawh hle a ni tih kan hriat a ngai a ni,” a ti.
Hmuaka chuan sawi chhunzawmin, “AMC By-election kan hma lawkah kan neih tur ah pawh BJP chuan theih tâwp kan chhuah leh dawn a, Mipui hnena Politics dik hriattir leh mipui thudik hrilh a, Mizoram-in kawng dik leh Hmasawnna dik kan neih theihna turin BJP Mizoram chuan theih tawp kan chhuah zel dawn a ni,” a ti bawk.
Dr K Beichhua MLA State Core Group Member pawhin thusawiin, “Mizorama Cyclone Remal vanga chhiatna thleng chungchang ah State President nen inrawnin, BJP Legislature Leader a nih angin Prime Minister Pu Narendra Modi hnena Mizoram ṭanpuina tur atan Rs. 1000/- Crore ziaka kan thehluh bakah, Union Home Minister, Pu Amit Shah, Chief Minister Mizoram Pu Lalduhoma te, Pu Vanlalhmuaka, BJP Mizoram State President te Copy pawh ka pe bawk a, tin, PMO Office pawh phone-a biain kan dilna pawh ṭha takin min lo dawngsawng a, an lo bawhzui ngei tur thu min lo hrilh ang ngeiin, Union Home Minister Pu Amit Shah chuan 1st June 2024 Saturday khan Mizoram CM chu phone-a rawn be nghalin, kan chhiat tawhna a chhawmdawlna hna an rawn thawh tur thu an rawn hriattir nghal a, BJP chuan heti taka kan ngenna Central-in min ngaih pawimawh sak hi a lawmawm kan ti hle a, hetianga ram pum huap anga chhiatna kan tawh ah chuan Party sawi lova, kan ram tan pheikhai rual taka ke kan pen zel hi kan insawmna a ni. Kan kal chhoh zelna turah State Sorkar lakah pawh eng lai pawhin tih theih kan nei a nih chuan englai pawhin BJP Mizoram chu kan inhawng reng a, State Sorkar pawhin chu chu min hriatsak se a ṭha hle ang,” a ti.
Beichhua chuan sawi chhunzawmin, “Mizoram mipuite hian hlauh tur dik tak Pathian hi kan hlauh a ngai a, kan do tur tak sual pawh kan hriat a ngai a ni. BJP hlauh kan inzirtir hi kan sim a ngai a, Politics dik, kalphung dika kal turin Mizoram mipuite inbuatsaih ila, ‘Mite’n min chhiar min thlir reng e’ tih hi kan infuihna ni reng se tih hi kan inchah duh a ni,” a ti bawk.
Inkhawm ah hian Lalramtiama, State Core Group Member leh N Joshua, State Core Group Member te’n thusawina hun an nei a, Cyclone Remal vanga thi te sunna hun he inkhawmah hian an nei bawk.