ZPM party chhung inkhawm nimina neihah Lalnghinglova Hmar, Minister of State chuan, “Ram mipuite hian min enchhin mai ni lovin min enchik a hle a ni,” a ti.
Minister Lalnghinglova Hmar chuan, “ZPM-in Sorkarna a chan tirh 8th December 2023 atangin Sorkar kalphunga thil pawimawh zawm ngaite zawmin hun kan hmang nasa hle a, Budget Assembly zawh a nih hnu lawkah MP inthlanin a zui leh a, vawiin thlengin Model Code Of Conduct-in min la phuar reng a. Hnathawh nana hun kan neih tlem ngaihtuahin Lalduhoma kaihruai ZPM Sorkar hian hna tam tak a thawk tawh a ni. Kum 1987 ah state kan ni a, chumi hnuah Political Party pahnih Congress leh MNF Party ten ro inrel chhawkin kan ram tan thil tha tam tak an lo ti tawh. Chutih laiin rualawhna leh thil thar beiseinain mipui rilru an tui em avangin Kalphung thar Mipui Sorkar- ZPM Party kan lo lang ve ta a ni. Mipuiten ZPM Sorkarah hian beiseina an nei sang hle. Mipuite hian min enchhin mai ni lovin min enchik hle a, kan ke pentin hi beiseina nen min thlir reng a, vawi leh khata ram kalphung thlak hlawk thei magician ang hialin min ngai a ni. Chuvang chuan mipuite beiseina hi kan hriat reng angai a, kan ram tan hma lam pana kan kal zel hi a tul hle a ni,” a ti.
Tetea Hmar chuan, “ZPM-te hian Ruling Party kan ni ve tawh tih hi kan hriat a ngai a, Rulling party reng reng chuan beih an tawk nasa thin. Chutiang chu kan dinhmun a ni chho zel dawn a, sawiselna zawng zawng chhanlet a tul ber lo a, tawng hun a awm a ngawih hun a awm a, puitling takin rulling party kan ni tih hriaa kan awm thiam a ngai hle a ni. Social media lama inbeihnate pawh hi enliam chin neih a ngai a, mipuiin min bei lo tih hriat reng a ngai, mi tlemte hrat lak ve hrim hrim te thil tih hi en dan tawk kan thiam a ngai a ni. Tunhmain rorelna chelhtu party worker-te zingah Sorkar hnathawk lo vau duh tawkte pawh an awm niin an sawi thin, ZPM-te erawh chuan nunze mawi tak kan chawinun a ngai a, ruling party nih kan thiam angai hle dawn a ni,” a ti.
Minister Tetea chuan, “Politician-te hian politics kan luh chhan a in ang lo hlawm viau a, engtak hi nge kan politics khelh chhan tih hi mahni inzawt nawn fo tur a ni. Mahni hamhai nan ringawt politics-a lut a awm thei a, chutiang mite chu ram thanmawhbawk an ni fo, ZPM te erawh chu kan in sawi angin kan danglam bik tur a ni a, kan politics luh chhan hi ram hmangaih vang a ni tur a ni,” a ti a.
“Kan hotute duhsaknain department pathum tunah hian ka enkawl mek a, kan Officers te nen lungrual takin kan thawk ho mek a ni. Kan thalaite tan Labour & Employment, Skill Development & Entrepreneur lamah pawh hmalakna pawimawh tak tak a kal mek a, Excise & Narcotics Department-ah pawh kan theih tawpin hma kan la chho mek a, ruih hlo vang hian kan thalaiten nunna hlu tak an chan nasa hle a, kan CM pawhin hei hi a vei em em a ni. Ruihhlo do kawngah hian Central YMA te nen pawh nasa taka hmalak chhoh zel a ni a, ruihlo chetkual vel dan pawh kan chhui chho mek a ni. Sorkar hmalakna chauh a tawk zo lova, NGO-te, a bikin Kohhrante pawhin ruihlo do kawngah hian kan tan tlan angai a ni. Kohhran hmalakna hi a hlawhtling duh hle a, kohhran hruaitute pawhin nasa zawk leh awmze nei zawka ruahmanna siamin ruihlo do kawngah hma la thar zel se ka duh hle a ni,” a ti bawk.
Sports Minister Lalnghinglova Hmar chuan, “Sport lamah pawh kumnga chhungin Sport Discipline hrang hrangah coaching kalpui tuma ruahmanna siam mek a ni a, Chhim leh hmar chhak leh thlanga kan thalaite talent hai chhuaka khawvel hriata Olympic thlenga pho chhuah hi kan tum a ni. Kan hmalawkah Sport khawmpui lian huaihawt kan tum a, June ni 13 leh 14 hian Mizoram National Sport Conclave buatsaih kan tum a, Indian Sport Federation hrang hranga hruaitute pawh kan sawm nghe nghe a ni. Kan theih tawp kan chhuah mek a, kalphung thar mipui sorkar hian mipuite beisei ang taka hmasawnna thlen ngei kan tum a ni,” a ti.
ZPM party chhung inkhawm hi Lalliansawta President, ZPM General Headquarters chuan kaihruaiin tunhnaia khuarel chhiatna nasa tak thleng leh nunna chante a tuarpuina thu a sawi a, Rosiamhnuna Chairman, Upa Committee chuan an puala tawngtaisakna hun hmangin chhung inkhawmah hian R. Zonunsanga PAC member chuan hunserh a hmang bawk a ni.