- Lallunghnema, Charity Lodge
Consumer Activity-a ka inhman hmâ kum 1992 lai bâwr vêl khan Consumer Awareness hi ka lo tuipui tan tawh a. Heng hun lai vel hian Aizawl District Consumer Forum hi a lo awm tawh bawk a ni. Chung hun lai chuan Pu RL Thanzâwna te, Dr Zokhûma te, Pu P. Lalnîthanga te, Pi Lalrintluangi leh Pu Lala Khawbung te kha Forum hotute hmasa,President leh Menberte an ni a. An hun lai khan mipui hriat pawh an la hlawh lutuk lo niin a lang. Complaint erawh chu an dawng thin a. Complaint ngaihnawm tak tak hriat tur a awm nual bawk .
Tum khat chu mi pakhat hian ABC fun khat Rs 5/- in a lei a.A kâwmah chuan Rs 3.50 a lo inchhu bawk si a.He abc fun leitu hian Consumer Forumah abc hralhtu hi a khing a, thiam a chang a.He Judgement hi a lawmawmin a dang dai hle a ni.
Hun a lo kal zel a, kei ve pawh hi thiante duhsakna avangin Aizawl District Consumer Forum-ah hian Member ka ni ve tawh nghe nghe a. Kan hun lai khan complaint (case) hi kan ngah em em mai thin a. Lu haina tham complaint ngaihtuah tur kan nei deuh reng thin a nih chu! Lawmman a tlem si, hahthlak tak a ni. Ka u Thanhawla phei kha chuan ,” Pu Hnem, complaint hi a tam si a, i dang ( prevent) mai ang u,” a ti hial a ni. Consumer Forum a ka awm hnu deuh atang khan thuziah ( article writing) hi ka lo ching tan ta a. Forum- a thubuai lo lut te chu ka article- ah chuan ka tarlang thin a. Mipui pawhin an bengvar phah deuhvin ka hria. Tun thleng hian khang hunlai a ka thil tawn leh hriatte kha ka tangkai pui em em a ni.
Tunah chuan, kan awmna Veng, Republic Mualveng chungah ah hian ka thawhpuite nen Centre for Consumer Education kan din ta a, thawh tur hma chhawp a awm reng a, a nuamin a buai theih hle a ni. Complaint kan dawng reng a , kan buaipui ang a, a then kan hlawhtlinpui a, a then kan hlawhtlinpui loh a awm thin bawk. Kristian inti Kristian tak ni lo nuna nung ho hian min tibuai a, min ei a, min lem zo mek a nih hi! Tunlai tak phei hi chuan online sumdawngho hian Consumerte an chawk buai hneh hle mai.
An customer-te bâkah an hnuaia thawktute leh hlawh pe tha duh lote, bungraw chah ang chah thlensak loh, tih felsak duh lo ho laka lungawi lo, mangang tak tak min puntu ka dawng deuh reng a ni. Bungraw chah loh zâwk intih thlensak hi thil sual a ni a,hlawh pêk that duh loh hi dan bawhchhiatna a ni bawk.
AR Canteen Manager nen:
Kum 30 chuang fe liam ta khan tûk khat chu thermos flask lei turin bazaarah ka va kal a. Ka duh ang ka hmuh mai loh avangin AR Canteen-ah hian ka lut a. Thermos flask chu an lo nei nualin ka duh ber ka lei ta a. Canteen a thawktute hi an bengvar a , dawr an nuam hle bawk a ni. Ka duh ang zan chu ka lei ta ngei a. Tichuan, hlim takin in lam panin he Canteen hi ka chhuahsan ta a nih chu!
In ka thlen chuan chhuang takin ka chhungte chu ka han entir vêl a. Canteen chu dawr a nuam tih thu te chu ha hîpin ka sawi a. Chhungpui nu ber chuan tui chu a han chhuang so va, Pailum ( thermos flask) ah chuan a han chhung lut ta ruih mai a. Thâwk leh khatah a keh ta chuai mai! Kan han hawng a , a ‘ flask’ lai tak chu a keh sawm vek a. Hrilh a hai, thin a rim!
Tichuan le,Chaw ei kham ve leh sipai canteen chu ka pan nghal a. Theih tawpin ka insûm a,heti hian ka ti a.” Hei tukin zing dar 7:30 vela in Pailum ( thermos flask) ka lei hi a tha lo, a chhe nghal, thleng ka duh ka ti a. He canteen a thawktute chuan min hriat thiampui khawp mai! An Pu, an Manager , pa lianpui mai chu be turin min ti a. Chu an Manager nen chuan kan in bak kaih ta hlak hlak mai a.
Hetiang hian kan indawr .
Keiosmah : Tukina in thil( thermos flask) ka lei hi a chhiaa, a puak a, a keh a ni .A thara thleng ka duh a,a rem em ?
Manager: A thleng theih loh!
Keimah: Min thlengtir phal loh chuan Consumer Forum- ah ka thlen ang
Manager: I thu thu alawm!
Keimah : Ka khing ngei ang che.
Kan inbiak hnu hian Ka Pailum lei chu thinrim taka khaiin ka kal ta a. An gate ka thlen hma deuhvin a naute chuan,” “Ka pu, ka pu lo kal leh teh, Manager- in a thar a pe dawn che, lo kir leh rawh “, tiin min au lawm lawm mai a, ka tlawm ngai deuh nâin ka va kir leh ta a. Tawi tein sawi ila. Thermo flask chu a thar min pe ta a . a hlui, a chhia chu ka hnutchhiah ta a ni.
(He ka article hi Pu Reubena, Rulpuihlim a nau anga ka neih,ka ngaih em em Consumer Right activity-a ka thawhpui Chatuan ram min pansan ta thlah nan leh nghilh loh nan ka hlan e. -llh)