MBOCWWB Rahbi Chhertu Mizo Inchai Title Fight 2026 Palian-ah champion lai, Lalsangliana’n mipui rin dan aia awlsam zawkin amah chotu, Lalremtluanga Chhangte lakah a kawnghren a humhim a, Upper Republic inchai chak hian kum 2014 atanga a kawl tawh kawnghren a kawl chhunzawm zel dawn.
Palian title inchuhna thawh lina laihawlah amah chotu, Remtluanga hi inhliamin a bei zui thei lo va, an inchai chhungin 34-0-in Sangliana’n hma a hruai hman a ni.
Kum 35 mi, Sangliana hi amah chotute laka a chet dan atangin a chungnung tial tial a. Kum 1972 atangin Mizo Palian Inchai Title Fight buatsaih a ni a, kum 15 chhung title kawl thei leh a beih apiang hneh vek chunga chawl, R Vanlalduata sulhnu a chhui mek a, kum 2030 thleng kawnghren a kawl thei a nih chuan a khum dawn.
Kum 27 mi, Remtluanga’n a vawi khat nan Palian title a chuh a, mipui beisei a pha lo va. Feet 6 leh inchi 1-a sang, Zobawk Lunglei tlangval hi kg 123-a rit, Sangliana aiin kg 10-in a zang a, inchai an tan phat atangin champion lai a su nghing zo lo a, a inveng nghal.
Sangliana’n chak satliah a ni lo tih lantirin thawh khatna tawp dawnah lehlam invenna thiatin a kuai zangthal a, vawi 10 chhiar thleng a bawhbet nghal a. A hnuah harsa lovin a kuai zangthal leh a, rei lo te chhungin thawh hnihna a titawp.
Thawh thumnaah pawh a hma ang thovin Remtluanga a tang zo lo va, thawh hmasa pathumah vawi 10 chhiar thlengin a zangthalin a bawhbet vek a, Sangliana tan engkim a awlsam.
Thawh khatin minute thum a awh a, thawh linaah dar betin vawi hnih chhiar thleng a bawhbeh hnuah Remtluanga a tal chhuak a, a hnuah vawi hnih chhiar thleng bawhkhupin Sangliana a bawhbet let a. Lunglei tlangval tal chhuak nawn leh mah se an inhrawm zuinaah a lu a hai a, eng emaw chen buaipui a nih hnuah inhnukdawk a, minute 1:36-ah referee Zorelliana’n inchai a titawp.
Kum 2024 khan Sangliana’n Lalrinchhana Sailo lakah chiang takin title a humhim tawh a, thawh 10 an inchai chhungin vawi 10 chhiar thlengin tum thum a bawhbet a, a pum puiah 66-0-in a chak a. Remtluanga nen an inchai chinah Rinchhana aiin a awlsam zawk a, kum 2022 khan 22-0-in Lalnunfela hneh mah se inbawhbeh pangngai a awm miah lo a ni.
Champion lai a nih avangin Sangliana’n Rs 1,00,000 a dawng a, Remtluanga’n lawmman pawisa fai Rs 50,000 bakah a hmuna a inchai tawiawmtu, Lunglei East bialtu MLA Lalrinpuii’n Rs 50,000 a hlan a ni.
Thawh hnuhnung berah kum 23 mi, Lalngaihsangi’n amah chotu, Zodinpuii beiseina titawpin a bawhbet a, a vawi hnih nan Nulian title humhimin 14-1-in a chak.
Kum 2022 khan Lalsiamthari hnehin a vawi khat nan Saichal nula a champion a, kum hnih kal ta khan Ramthar Lunglei inchai chak, Zodini nen LPS Arena-ah tho an intawng tawh a, thawh nga an inchai chhungin 11-11 ni mah se inbanphawi hmangin Sangi’n a vawi khat nan Nulian title a humhim hram.
Kum 2024-a a chak loh danah kum 24 mi, Zodini a lungawi lo viau a, a cho nawn lehnaah kg 75-a rit niin amah aia kg 10-a rit lakah chak ngei turin a inringtawk a; mahse, an inchai hmasak aiin chet a harsat a, thahrui a nei fei lo zawk bawk a, chak phuin a inlan zo lo.
Thawh hmasa berah Sangi’n nawr chhuakin point khat a hmu a, thawh hnihnaah Zodini’n nawr chhuak ve thungin an point hmuh a inzat chiah a. Point awm lovin thawh thumna leh lina hmang zo mah se Sangi’n a nawr a, a tuan a tha zawk.
Thawh nganaah Zodini a tla hniam a, Sangi’n kuai letin a zangthalin a bawhbet a, vawi thum an chhiar hnuah lehlam a tal chhuak a; mahse, a inveng zui thei lo va, Saichal nulain a nuai hneh a, vawi 10 chhiar thleng a bawhkhupa a bawhbet hnuah inchai a tawp zui ve nghal.
A vawi thum nan a champion rualin Sangi’n Rs 50,000 a dawng a, a pianpui unaute pathum ko chhuakin a naupang ber a nih thu sawiin a hlawhtlinna kawngah a u-ten hmun pawimawh an luah tih a sawi.
Kum 2022 khan Nulaihawl Title Fight-ah Elizabeth Roblupuii hneh lovin Zodini a tlawm tawh a, Nuliana a insawn hnuah Sangi lakah a tlawm nawn a, title chuha vawi thum inlan zawnna a nih rualin a chak lo zawkah a tang vek. Lawmman pawisa fai Rs 30,000 bakah a hmuna a inchai entu, Lunglei East MLA-in Rs 50,000 a pe.