Telugu Desam Party hruaitu, Lok Sabha inthlanpui neih zawh taka tling zinga hausa ber, Chandra Sekhar Pemmasani chu Pathianni zana sorkar thar lak luhah Union Council of Ministers-ah a tel ve a, Prime Minister Narendra Modi-a sorkara minister zinga hausa ber a ni zui dawn.
Pemmasani-a hi N Chandrababu Naidu-a party atang hian Andhra Pradesh-a Guntur bial atanga thlan tlin a ni a, a hausakna hi Rs. veibelchhe 5,700 zet a ni.
Inthlanah khan YSRCP atanga chuhtu, Kilari Venkata Rosaiah chu vote nuai 3.4 chuangin a hneh.
TDP hruaitu, Jayadev Galla chuan Pemmasani-a hi Modi 3.0-ah hian minister of state a ni dawn tih a sawi a, Pathianni zan khan Rashtrapati Bhavan-ah lak luh ve a ni.
TDP atang hian minister turin Ram Mohan Naidu Kinjarapu nen lak luh an ni a, ani pawh hi union cabinet minister naupang ber a ni nghal dawn a ni.
- Tu nge Premasani?
Burripalem khua, Andhra Pradesh-a Guntur district-a piang, Pemmasani hian Osmania University atangin MBBS a zo va, Geisinger Medical Center, Danville, Pennsylvania-ah a cheng a. Johns Hopkins University-Sinai Hospital-ah kum nga chuang zet physician niin a thawk a, hostel-a awm leh damdawi zirlaite hnenah zirtirna a pe thin bawk.
Kum 48 mi a ni a, online-a zirna kalpuina, UWorld dintu leh CEO a ni a, TDP NRI cell-ah hruaitu hriat hlawh tak niin US-a a awm chung hian an party programme tam tak huaihawtin a buaipui.
Pemmasani hian kum 2020 khan US-ah entreprenuer naupang a nih avangin Ernst & Young Award a dawng a. Pemmasani Foundation din bawkin hemi kaltlang hian Guntur leh Narasaraopet-ah health camp buatsaihin tui in tur an pe thin.
Guntur Lok Sabha bialah hian January, 2024-a politics chawlhsan ta, vawi hnih MP lo ni tawh, Jayadev Galla a thlak a ni.
Inthlan dawna affidavit a thehluh, Association of Democratic Reforms-in a tar lanah chuan Pemmasani hi inthlan chuhtu mi 8,360 zinga hausa ber a ni.