Pathianni zan khan Rashtrapati Bhavan, Narendra Modi-a chu rinawmna thu tiamtirin a zawna a vawi thum nan India prime minister atan lak luh a ni leh ta a. Hemi hma lawk hian NDA hruaitu lawk zual, minister ni ngei tura rinlawkte chu an inhmu khawm.
He chanchin ziah lai hian sorkar thar hi lak luh a la ni lo va, minister tharte leh an hna chanpual pawh hriat a la ni lo.
Prime minister-in thu a sawi laiin BJP hruaitu hlun leh NDA-a tel an thawhpui hruaitute chu tlar hma langsar laiah an thu hlawm.
Inhmuhkhawmnaa tel zingah hian Amit Shah, Rajnath Singh, Nitin Gadkari, Nirmala Sitharaman, Dr S Jaishankar, Dharmendra Pradhan, Ashwini Vaishnaw leh Piyush Goyal te pawh telin anni hi Modi 2.0-ah khan a langsar ber ber an ni a. BJP hruaitu hlun, Shivraj Singh Chouhan leh Jyotiraditya Scindia; JDU hruaitu Rajiv Ranjan Singh, HAM hruaitu Jitan Ram Manjhi, RLD atangin Jayant Chaudhary, JDS hruaitu HD Kumaraswamy, LJP (Ram Vilas) chief Chirag Paswan leh Jitin Prasada te pawh an tel.
Modi 2.0 leh Modi 3.0 sorkara danglamna lian tak chu Lok Sabha-ah BJP-in member an nei tlem dawn ta sawt hi a ni a, tun sorkar tharah pawh hian an thawhpuite thlawpna nen NDA sorkar a ding thei hram dawn a. Hetiang a nih avang hian an thawhpui party-te hnenah chanvo pawimawh pawh an telh a ngaih phah.
N Chandrababu Naidu-a kaihhruai TDP leh Nitish Kumar-a kaihhruai JDU chuan a chhe berah cabinet minister leh minister of state pakhat ve ve tal an chang dawn nia sawi a ni.
Cabinet thar tur sawi hian darkar 11 zet Inrinni khan prime minister chenna inah an thukhawm a. Shah, BJP chief JP Nadda leh an party national general secretary (organisation) BL Santhosh te pawh an tel.
Prime Minister Modi hi Pathianni zan dar 7.15 khan lak luh a ni.
Home Minister Shah, Defence Minister Rajnath Singh leh Roads & Highways Minister Gadkari te chuan an chanvo ngai an chelh leh dawn nia sawi a ni a. Rajya Sabha MP pahnih, Sitharaman leh Dr S Jaishankar te pawhin an chanvo ngai, finance leh external affairs an chang leh dawn nia sawi lawk a ni bawk.
An thawhpui zingah LJP (Ram Vilas) atangin Chirag Paswan, JDS atangin HD Kumaraswamy, Apna Dal (Sonelal) atangin Anupriya Patel, RLD atangin Jayant Chaudhary leh Hindustani Awam Morcha atangin Jitan Ram Manjhi te chu minister ni tura sawi an ni bawk.
Eknath Shinde-a kaihhruai Shiv Sena atangin Buldhana MP Prataprao Jadhav chu minister tura sawi a ni a. Rajya Sabha MP, BJP thawhpui hlun tak, Republic Party of India (A) hruaitu, Ramdas Athawale pawh minister tur zingah a tel.
Modi 2.0-a parliamentary affairs changtu Pralhad Joshi, Haryana chief minister hlui Manohar Lal Khattar leh Madhya Pradesh-a hruaitu lawk Shivraj Singh Chouhan leh Jyotiraditya Scindia te pawh minister ni leh tur zingah an tel.
India hmarchhak atanga BJP hruaitu, Sarbananda Sonowal leh Kiren Rijiju te pawh minister an ni leh ang a, belhtu pawh an nei mai thei bawk.
Minister ni tur zingah hian G Kishan Reddy, Shobha Karandlaje, BL Verma, Bandi Sanjay Kumar, Nityanand Rai leh Giriraj Singh te pawh sawi rik an ni bawk.
BJP hian inthlanpui neih zawh takah khan bial 240 an la a, mahnia sorkar siam turin 32-in an tlin lo va, Naidu leh Kumar-a te party-in an belh hnuah sorkar an siam thei dawn ta chauh a ni.
Hetianga minister tur a chian thawkhat hma hian BJP chuan chanvo pawimawh zual pali – home, defence, finance leh external affairs chu party dang mite an chelhtir dawn lo tih an lo sawi tawh a. Modi 1.0 leh Modi 2.0-a an hlawhtlinpui, inkalpawhna kawnga hmasawnna an thlen chu chhunzawm zel an tum thu leh chumi atan chuan Gadkari-a bawk an duh leh thu an sawi bawk.
MP 16 nei, TDP leh 12 nei, JDU te hian chanvo lian zawk an phut nia sawi a ni a; mahse, Prime Minister Modi-a sorkar tharah hian an duh ang chiah chu an chang dawn lo a nih hmel.
JDU atang hian an party chief lo ni tawh, Rajiv Ranjan Singh leh Rajya Sabha MP leh Bihar chief minister hlui, Karpoori Thakur-a fapa, Ram Nath Thakur te chu minister tur an ni a. TDP MP pahnih, Dr. Chandra Sekhar Pemmasani leh Ram Mohan Naidu Kinjarapu te chuan Modi 3.0-ah hian hmun an chang ve dawn niin an party hruaitu, Jay Galla chuan X-ah a tar lang bawk.