Aizawl : MZP-in Mizorama Dentist (Ha Doctor) hnathawk zingah document lem hmanga hna hmu awma a hriat avângin, hmala turin Health Minister Lalrinpuii an ngen hnu ah document lem hmanga sorkara hna hmu nia hriat Dentist-in banna a thehlut a, a banna thehluh pawh pawm a ni.
Thudawn danin, Chris- tina Lalthazuali, Dinthar Veng, Aizawl chuan Regional Institute of Medical Sciences (RIMS), Imphal, Manipur atanga Bachelor of Dental Surgeon (BDS) zirzo anga document pawimawhte neiin National Health Misson hnuaiah a hmu a. Hemi hnu hian RTI hmanga zawhna chhanna atangin Christina Lalthazuali’n RIMS, Imphal-ah BDS a zir lo tih hriat niin, document lem hmangin National Health Misson hnuaiah hna a hmu tih hriat a ni ta a ni.
Hemi chungchang hi MZP-in bawhzui nghalin, chhui chiang tur leh a tul anga hma la turin Health Minister an ngen hnu ah document lem hmanga sorkar hna hmu nia hriat Christina Lalthazuali, Dinthar Veng, Aizawl chuan banna a thehlut ta a. A banna thehluh pawm a nih thu pawh tun thla ni 6 khan National Health Misson, Mission Director Dr. Eric Zomawia chuan a tichhuak zui nghal ta bawk.
MZP chuan an ngenna ngaipawimawha Health Minister-in chak taka a bawhzui avanga lawmawm an tih thu an sawi a. Document lem hmanga hna hmutuin June ni 5, 2024 a banna a thehluh June ni 6, 2024 pawm nghal a nih avangin lawmawm an ti hle tih an sawi bawk a ni.