Hnam Run chhung inkhawm nimina neihah F. Aithanga, National Core Committee Member MNF General Headquarters chuan MNF chu political party satliah ni ve lo, Mizo hnam movement keng nungtu, Mizo hnam lungphuma innghat a nih thu a sawi.
“ZPM chuan kalphung thar an ti a, chu chu a phaw vuak mai mai umin mipui kan kal ta vel mai mai a. Rammute ram mut chhan leh an thih chhan pawh kan ngaihtuah pha ta lo. Martarte thisen kha eng angin nge a luan a, chu chuan kan thinlungah eng chin chiah nge a luah tihte kan hre pha ta lo a. Martarte thisen zahawmzia kha i hre reng ang u. Hnam thinlung, Mizo Nationalism tak tak kha thangtarten kan ngaihtuah pha ta lo a, a pawi takzet a. Martar-te thisen zahawmzia kha i hre thar leh hram ang u,” a ti.
F. Aithanga chuan MNF chuan thil tha chu su ngamin a thihpui ngam tur a ni a, a tha lo hnualsuatin zawldawh theihna leh tawrh feina a nei tur a ni tiin, Mizoram leh hnamin hma a sawn zelna tur leh Mizo hnam dam nan MNF a thawhkan leh thuai a tul thu a sawi a. Mizoram hian kalphung thar awmze neilo a mamawh loh thu leh, kalphung fel tak leh nghet tak neih a tul zawk thu a sawi bawk.
Hnam Run chhung inkhawm hi Upa Dr.H. Lallenmawia Adviser, MNF General Headquarters chuan kaihruaiin, Rochhunga Ralte Ex-MLA, Adviser MNF General Headquarters chuan hunserh a hmang.