BJP Mizoram in nimin khan karthar inhlanna leh Political Session hun neiin, inkhawm hi VL Awia State Secretary-in inkhawm a kaihruaia, Vanupa Zathang, IPS (Retd), State Vice President-in thusawina hun a nei bawk.
Vanupa Zathang chuan, “India ramah Pu Narendra Modi kaihhruai sorkar term thumna chu tluang taka lakluh a ni leh ta hi a lawmawm hle a, India ram hmasawnna nasa tak kan hmuh belh leh ngei dawn tih a chiang hle a ni,” a ti.
Vanupa chuan, “Central-ah BJP kaihhruai Sorkarna a kan hmuh ṭhin ah hian Kristiante tana Minister nihna chanvo pawimawh pek kan ni ṭhin a, Kristian MP kan nei lo a nih pawhin ruat seat hmangin min dah sak mai ṭhin te hi a lawmawm takzet a ni. Tun ṭum ah pawh BJP aṭanga Kristian MP tling an awm tak loh avangin Pu Narendra Modi chuan Kristiante min ngai pawimawh a ni tih a hriat hle a, MP pawh nilo Kerala BJP Vice President hna chelh mektu leh National Commission for Minorities-a Vice Chairman hna lo chelh tawh Pu George Kurian, Kristian ṭha tak mai chu MoS atan lakluh a ni ve leh a. Nimahsela thla 6 chhung ngeia MP nih a ngaih avangin, Pu Modi hian Rajya Sabha seat khawi State emaw ber aṭangin a pek angai thung dawn a, chutiang taka Hnam tenaute leh sakhaw tenaute duhsaka ngaihsaktu BJP kaihhruai Sorkar kan nei leh tur hi a lawmawm hle a ni,” a ti.
Vanupa Zathang chuan sawi chhunzawmin, “Mizo te’n a khawvel ram kan thlir pawha, kan ralkhat tlṭan êm êm Israel Ram pawh BJP Pu Modi kaihhruai Sorkarna hnuaiah chuan an lamah India kan ṭang zel a, Congress Sorkar ah thung kha chuan India kha Palestine lam ah a ṭang thung a, hemi ah ringawt pawh hian BJP Sorkar hian Kristiante min treat dan tak tak chu kan hriain kan hmu thei a ni. Chutiang a nih avang chuan Mizoram mipui pawh hian India ram lo hruai tawhte hmalak dan leh BJP Sorkar hmalak dan te thudik hria a, tute thusawi mai mai avanga inbum tir fo lo turin kan inchah duh a ni,” a ti bawk.
Dr. Zonuntluanga, State Secretary pawhin thusawina hun a nei bawk.