- Er. Chhungpuia Renthlei; Senior Technical Officer, NIELIT Aizawl
Cyberbullying chu enge ni ?
Bullying chu mi sawisak, tihduhdah leh vau hi a ni. Cyber bullying chuan email, text messaging, phone call, social media, audio and video platforms e.t.c hmanga mi sawisak, tihduhdah, chhaih, vau leh zar buai te hi a huam vek a ni. An tum ber chu midang rilru hah leh mualpho taka siam a ni. Hetianga technology hmanrua smartphones, computers, tablets, leh gaming systems hmanga mi rilru tihreawm khawpa zar buaitu te hi Cyber Criminal ngeiawm tak an ni.
Thil sual titu te hian an mi huat zawng email, phone numbers, Facebook, Twitter, Instagram, etc. account lem an siam a, thu ngei awm leh mualpho thlak tak tak an post thin. Account an hack saka, an profile picture leh personal information an thlak sak thin. Facebook, Twitter, Instagram, etc. account atangin an thlalak an ruk sak a social media ah an post darh thin. Heng thlalak te hi a neitu ten midang hmuh atana an duh lem loh saruak thlalak te, duh dah taka an awm lai thlalak te a ni thin. A chang chuan a rukin audio leh video in an an thusawi lai te an lo record sak a, social media ah an vawrh darh sak thin.
Mizoram leh cyber bullying:
Mizoramah Social media a intihhmingchhiat theihna tur thu leh milem post darh ching te, midang zahawmna leh inlaichinna tichhe zawnga social media kaltlanga thu diklo vawrh darh te, mualpho tak leh zak taka siam te leh naupang vau hial te pawh hriat tur atam ta hle mai. Political party inbeihnaah ngat phei chuan ringlo mi te aiin kan nasa zawk emaw tih mai turin aia upa zahna a awm lo a, rilru na taka midang siam turin tawngkam huat thlala leh ngeiawm tak tak hmangin mi thu post te, an thlalak leh profile te ngeiawm taka comment hmuh tur a tam hle bawk. Social media anih avanga duh duh sawi theih emaw ti thin tu te hi kan inkhap ngam a tul hle mai.
Hremna:
Cyberbullying hremna hi an pawi khawihna dan a zirin chi hrang hrang a awm. Pawikhawihtu te hi Information Technology Act, 2000 (amended in 2008) leh The Indian Penal Code (IPC) hmanga hrem theih an ni.
IT Acts 2008 hmanga hremna:
Section 66(D)[9]: Internet leh social media platforms hmanga midang hruai sual leh blackmail tu te hi kum 3 thleng jail tan leh a tlem berah cheng nuai1 chawi tir theih an ni.
Section 66(E)[10]: Phalna neilova mi chanchin chhe lai leh thlalak thawndarh tu te hi kum 3 thleng jail tan leh cheng nuaih 3 chawi tir theih an ni.
Section 67[11]: Social media kaltlanga midang deusawh leh chaltlai taka thu thawn leh hmingchhiat theihna tur an chanchin thawndarh tu te hi kum 5 thleng jail tan leh cheng nuaih 10 chawi tir theih an ni.
Indian Penal Code (IPC) hmanga hremna:
IPC ah hian Cyber bullying tan bika hremna awm lo mahse, part thenkhat te hi an hmang thin
Section 507:[12] – mi tih thaih a, hlauthawnga siamtu te hi kum 2 thleng jail tan tir theih a ni.
Section 354(C):[13]- Remtihna tellova hmeichhe thlalak sak leh midang hmuh atana an duh loh thawndarh saktu te hi pawisa chawitir leh kum 1-3 thleng lungin tan tir theih a ni. An ti nawn leh a nih chuan kum 3-7 thleng jail tan tir theih a ni.
Section 354(D):[14]- Mi remtihna lova an mahni vau nan leh intihhmingchhiat na tura internet a an thil tih leh awmna hmun enthlatu te hi kum 3 thleng jail tan tir theih a ni.
Fimkhurna tur te
Aw le, Mizoram ah social media platforms leh Mobile Apps kan hmang nasa hle mai . A bikin tleirawl leh thalai te phei chu a tellovin kan awm thei tawh lova, nu leh pa te pawh kan bang bik lo. Hnam changkang te nunphung kan entawn ta sa sa, nu leh pa te hian kan fate abik takin kum tlinglo te social media sites, apps, leh browsing history te hi kan monitor a, an user names & passwords leh social media account an neih te hi kan hriatpui a pawimawh hle.
A theih chen chenah a himlo a kan hriat phei chu block sak a tha Hmeichhia phei hi chu fimkhur a ngai zual. Kan mualpho theihna ang chi hrim hrim post loh a him. Language translator a awm vek tawh avangin hnamdang pawhin awlsam takin kan thu post hi an hre thei tawh si a, Social media a kan thu post ah leh mi thil tih kan comment naah tawngkam mawi leh zahawm zawk hmang ila a duhawm ngawt mai.