MZP General Headquarters Aizawl hruaitute chuan nimin khan Mizoram Chief Minister Lalduhoma chu a Office Mc Donald Hill, Zarkawtah an hmu a, Chief Minister hi Remna Ni 2024 hman dan tur chungchang sawipuiin, Khuallian atan an sawm nghal.
Remna Ni 2024 hi Pathianni a nih avangin, ni 28 June, 2024 (Zirtawpni) chhun hian LPS Arena, Falkland, Aizawl-ah MZP buatsaihin hun hman a ni dawn a. Lalduhoma Chief Minister chu khuallian a ni ang.
Remna Ni-ah hian, Remna a awm theih nana thawhhlawkte chawimawina neih leh a ni ang a. Zai leh lam hrang hrang entir a ni bawk ang. Remna Ni 2024 hmang tur hian Sikul hrang hrang leh Pawl hrang hrang bakah mi pawimawh tak takte sawm an ni a. Programme hi LPS leh Zonet bakah Youtube-ah live a pekchhuak a ni bawk ang.
MZP chuan Remna Ni 2024 hman pui tur leh programme-te lo thlir turin Zoram dung leh vang a Zofate a sawm a. Mizoram-in remna leh muanna a neih champhaphâk pual hian Pathian hnenah lâwmthusawi tawngtai nei tur leh, Remna hlut zia hre thar ṭheuh turin mitin an ngen bawk.