Nimin khan REMNA NI vawi 38-na, Mizo Zirlai Pawl (MZP) General Headquarters buatsaihin LPS Arena, Falkland, Aizawl ah hman a ni a, he hunah hian Lalduhoma, Chief Minister chu Khuallian niin Remna ni puanzar a pawt parh a, thusawina hun a hmang bawk.
Chief Minister chuan,”Ram hruaitute hi mihring ve tho kan nih avangin kan thil tih zawng zawng a fuh vek thei bik lova, hlawtlin ni awm thin mahse hlawhchham chang pawh a awm lo thei lo. Pu Laldenga ho a, MNF in Zalenna an sual pawh a hlawhtling ta bik lova, Pu Laldenga pawhin Zalenna sual chu mizo mipuiten kan zo lo tih hriain huaisen taka inhnuk dawkin India Sorkar nen inremna an lo ziak ta a ni. Hetianga thil a kalfuh lo tih hriaa, remna duha a inhnuk dawk leh thei hi a fakawm hle a ni,” a ti.
Duha chuan, “Mizoramin Remna kan neihna tur hian a kalkawng a thui hle a, harsatna tam takin min tlakbuak nasa hle a ni. Kei ngei pawhin ka hna kalsanin remna zawngin ke ka pen a tul a, a hnu zelah pawh MP atanga ban hmasak ber ka lo ni ta hial ani. Kohhran leh zirlai pawl ten tha nasa takin an thawha, All Mizoram Political leaders te bakah mimal hming tam tak lam rik tur leh chawimawi tlak an thahnem hle a ni, remna kan neih theina tura nihna hlu tak kalsan zawng zawngte rilru ah an awm reng a, he remna atana theih tawp chhuahtute chatuan ram pan ta zawng zawngte pawh kan hre reng a ni,” a ti a.
“Inremna thutlung ziah dawn khan Pu Laldenga demand tihhlawhtlin loh zingah Greater Mizoram tih kha a tel a; tunhnaiah zohnathlakte delh chin ramah buaina leh harsatna nasa tak a thlenga, hei hian ngaihtuahna a ti kalthui hle a ni, Zohnahthlakte inpumkhatna tur hian he India ram chhung ngeiah hian Greater Mizoram kan din hmasak phawt a tul a, India Sorkar laka buaina siam lovin zohnahthlakte hian inpumkhatna kawngah hma kan lak thiam angai hle a ni. India Sorkar hi Sorkar tha tak a ni a, keini ang hnam tenau, enkawl duh sorkar hi khawvel ram dangah an vang em em a, hnam bil anga hmalaknate hi kan bansan a tula, kei ngei pawh tuman a hran hranin min rawn dawr tawh lo se la ka duha, Zohnahthlak kan nih anga inpumkhatna lam kan hawia Greater Mizoram din theih hi kan hnam tan thil pawimawh tak a ni. Pathian hian hnam ropui takah min din chhuah a tum mek niin ka hria, kum chawhnu lam kan ni tawha, keinin a hlawhtlinna kan hmu pha ve ta lo a nih pawhin, vawiina thang tharte hian ka thu chah hi rawn hre reng ula, rawn bawhzui zel ang che u, thim thuah hnih ni lovin hmalam eng beisei chungin kan hnam hi i kal zel ang u,” a ti bawk.
He hun hi C.Lalremruata, Vice President MZP in kaihruain, Rev.R.Lalrinsanga, Secretary MKHC chuan hunserh a hmanga, Chinkhanmanga Thomte, General Secretary MZP hnen atangin inhmelhriattirna hun hman niin, Sorkar mipawimawhte bakah Sikul naupang thahnem tak leh Political Party hrang hrang aiawhte leh NGO hrang hrang te bakah Cultural Club leh Zaimi thahnem tak an tel bawk a ni.