Chief Minister Lalduhoma ngenna avangin Bangladesh atanga raltlan, Bawm raltlan 126-te chu Mizoram state police kutah hlan an ni dawn.
Delhi-a cham mek chief minister Lalduhoma chuan Bawm raltlan chungchangte chu Prime Minister Narendra Modi a sawipui a. Bawm raltlan 126 te chu BSF ten Damdepa an lo man khawm chu, Bangladesh rama nawr kir leh tumna awm chu chief minister Lalduhoma chuan, ramri kana Mizoram chhung an thlen tawh chuan, state sorkar mawhphurh a nih thu leh, eng kawng maha thawn kir a rem loh thu PM Modi a sawipui hnuah, raltlante hi nawr kir lo vin, Mizoram police kutah hlan an ni zawk dawn ta a ni.
Home Minister K Sapdanga sawi danin, Bawm raltlante hi BSF hian nawr kir leh tumin Inrinni khan ramri bul Kamtuli-ah an phur kir hman a. Home Ministry atanga thu an hmuh tak avangin BSF hian Kamtuli atangin Chhippui khuaah an phur kir mek a, Pathianni tlai dar 3:30 khan mi 42 phurh thlen an ni tawh a. Chhippui khuaah en fel ngaite an en fel zawh hunah Chamdur P an panpui ang a, state police kutah hlan an ni ang.
Raltlante lo dawngsawng tur hian Lawngtlai DC office atangin Civil officer te, SDPO-ten buhfai kengin Chamdur an thleng tawh a, Chawngte SDPO hoin Mzoram police ten en escord bawk. Bawm zirlai hruaitute leh Tuichawng Group YMA hruaitute pawhin raltlangte hi an tawiawm a, Mizoram police kuta an awm hunah an chenna tur an ngaihtuahpui nghal ang.