Jail tang tlan chhuak thawm hriat tur a awm fo a, kuminah Mizoram chhung Jail thenkhata tang mi 10 an tlan bo tawh a, an zingah man leh pakhat chiah a la awm.
Prison department atanga thudawn danin, kumin chhunga jail tang tlan chhuak te hi Central Jail,Aizawl-a tang mek mi 7, Kolasib district-a tang mek 1 leh Serchhip district-a tang mek mi 2 te an ni a. Mi 10 zinga pariat te hi Jail pawn, District court-a in lan tura hruai chhuah te, damdawiina dah, Police venna hnuaia an awm laia tlan chhuak te an ni a, mi 2 te erawh an tanna hmun Serchhip district jail atanga tlan chhuak an ni.
Kumin chhunga jail tang tlan chhuak zinga mi 8 te chu ruihhlo kaihhnawih veka man an ni a, tunhnai maia tlan chhuak thar serchhip jail atanga tlan bo te erawh AK 47 mu thahnem tak nena man an ni a, an vai hian Mizoram pawn, Myanmar leh Manipur lam mite vek an ni.
Tunhnaia Serchhip District Jail atanga tlan chhuak zinga mi Lalnunnema (31) Thantlang, Myanmar chu Pathianni zan khan man a ni leh tawh a, a tlanbo pui pa erawh man a la ni lo.
Nikum 2023 chhung khan Mizoram chhung lungin hrang hranga tang, tlanbo mi 30 awmin, an zinga mi 15 te chu man an ni leh tawh a. Tang tlan chhuak mi 30 zinga mi 19 chu an tanna hmun atanga tlanbo an ni a, mi 11 te erawh Jail pawn, Police venhimna hnuaia an awm laia tlang chhuak an ni thung.
Thudawn danin, jail tangte hi court-a hruai emaw damlohna emawa jail atanga hruai chhuah an ni hian Prison lamin an buaipui tawh lo a, Police te’n vengin an buaipui tawh thung a ni.