PC Party chuan nimin khan Adviser to Chief Minister 5 te chungchang Governor leh ZPM Val Upa Council hnenah thlenin, “Adviser to CM 5 te hi ban tur an ni,” tiin President Vanlalruata’n a sawi.
An party thuchhuaha an tarlan danin, Kum 2003-a India danpui siamthat avanga Mizoram in Minister 12 aia tam lo chauh kan neih theih thu sawiin Ruata chuan, “Sorkar laipui leh India ram state dang ang thovin hemi hma hian minister kan nei nual thin a. State kan nih hnuah 1987 term-ah minister 11 neiin 1989 te, 1993 te leh 1998 term-ah te minister 15 kan nei a. Heng hi hun laklawhah tihdanglam niin kan neih tam lai ber phei chuan 17 kan nei a ni,” a ti a. Minister ngah chu tul lova mipui sum khawhralna nia sorkar laipuiin a ngaih avangin kum 2003 khan minister awm thei zat a bituk tak thu sawiin Ruata chuan, “Tuna Adviser to CM 5 kan neih avanga mipui sum senral belh tur hi cheng nuai 845 chuang niin an chhut a, tun term hi an hmang tluan anih chuan hei aia tam Fe hi sen a ni ang,” tiin heti zat mipui sum khawhral thlawnna tur, Danpui kalh ni bawk hi tihtawp nghal a tul avanga PC Party chuan Governor leh ZPM VUC hnena thu thlen ta an nih thu a sawi.
Hetiang thil hi mipuiin kan ngaimawh mai ni lovin Supreme Court leh High Court ten an ngaimawh hle tih sawiin Ruata chuan, “Goa, Haryana, Telangana, West Bengal, Punjab leh Assam-a hetiang kalphung phuahchawp hmanga Parliamentary Secretary ruat te pawh Court in a paih tir vek a. Kum 2008 term-a Mizorama Parliamentary Secretary 7 ruat te pawh an bang vek a ni,” a ti bawk.
Adviser to CM 5 kan neih hi Danpui kalh, tul lova mipui sum khawhralna, sorkar hmalakna tikhawmuangtu mai anih avanga kan ram leh hnam tana tihtawp anih thuai theih nana mahni theihna zawn theuh atanga hma la turin PC Party chuan mitin kan sawm a ni, an ti.