- Ruata
Hyundai chuan hlawhtling taka an micro SUV tha leh mawi, Exter an hralh tak hnuah special edition thar Exter Knight Edition an tlangzarh.
He special edition thar hi a lirthei variant-ah chuan SX leh SX (O) variant tlukpuiah duan a ni a. A man hi Rs. Nuai 8.38-10.43 inkar a ni. Knight edition tih hian a landanah a danglam a ni deuh ber a. Sports lam hawi zawnga chei niin rawng dum leh sena a chei a ni ber a ni.
A pawn lamah hian a hnung leh hma skid plate a rawng a dum a. Heng bakah hian a brake calliper bakah a hma bumper leh hnung bumper chu rawng sena chei a ni. Rawng chi hnih duhthlan tur thar a rawn awm dawn a, heng te hi Shadow Grey leh Abyss Black a ni a. Heng bakah hian rawng kan lo hmuh thin – Atlas White, Starry Night, Shadow Grey, Ranger Khaki, Ranger Khaki with black roof leh Shadow Grey with black roof te a awm bawk a ni.
Rawng dum hi a chhunglamah pawh kan hmu bawk a. A chhunglam hi all-black interior theme niin khawi emaw laia rawng sena chei leh a leather hrang hrangah la sena thui tial hmanga chei a ni bawk a. Heng bakah hian a ti Knight edition turin hmundang hrang hrangah chei danglam a ni bawk a ni.
A khawl lamah chuan a pangngai nen danglamna a awm lem lo a. 1.2L, 4-cylinder naturally aspirated petrol engine, manual leh AMT gearbox duhthlan tur awm te a hman chhunzawm zel a. He khawl hian 83bhp power leh 114Nm torque te a pechhuak thei a ni.
- Hyundai chanchinthar dang
Hyundai hian chanchinthar tharlam tha tak tunhnaiah a nei a. Hei hi Maruti Suzuki Fronx leh Toyota Taisor te el tur lirthei thar tur, Bayon an tihchhuah tur thu a ni a. Hei hi khawvel hmundangah chuan a chhuak mek tawh a, India ramah pawh kum 2026 chhoa tlangzarh theih turin thawm an rawn neih tir tan niin media report hrang hrangin an tarlang a ni. Hei bakah hian electric hmang lirthei te lamah tichhuak turin Hyundai chuan hma an la mek bawk a ni.