BJP Mizoram chuan nimin atanga tanin Extended State Executive Meeting, BJP Mizoram State Office Upper Republic ah an nei a, he hun hmang tur hian George Kurien Union MOS For Minority Affairs leh Devesh Kumar MLC Bihar State, Mizoram State Prabhari te chu an lo kal a, District hrang hrang hruaitu te he hun hmang tur hian an kal khawm a ni.
Nimina inkhawm hi Session hnih a neih niin, Session hmasa hi Malsawmtluanga State General Secretary in a kaihruaia, Session hnihna hi Vanlalhmuaka State President in a kaihruai bawk a ni.
He hun hmang tur a lo kal George Kurian chuan thusawiin, “Ka nunah hian a hmasa berah Lal Isua Krista hi ka dah ṭhin a, ṭawngṭai hi ka ngaipawimawh em em a ni. Ka naupanlaiin kan Mathematics zirtirtu chuan Mathematics subject thiam tur chuan formula kha sawi reng mai tur, in awm mai mai pawhin in rilru in sawi reng rawh u min ti ṭhin a, chutiang chiah chuan ram rorelna ah dikna leh hmasawnna a lo thlen theih nan kan ṭawngṭai reng mai tur a ni. Fianrial hunah chauh ka ṭawngṭai ngai lo, tunah pawh in zingah ka ṭhut a ka lo thlen tirh pawhin ka ṭawngṭai a, kan nun hi ṭawngṭai nun nise, chutianga kan tih chuan Lal Isua Krista hian min kaihruai anga, chutianga tawngtai mi te chuan Isua an dah hmasa lo thei lo a ni.
George Kurian chuan BJP chu development party a ni a development duh zawng chu BJP ah lo inpe vek turin ka sawm che u a, ka ministry hnuaiah scheme hrang hrang awm te chu kan duh anih chuan theihtawp chhuahin ka lo tanpui dawn che u a, BJP Prime Minister Modi hian community tin te ang khat vekin min en a, Development hi India mipui huapin kan kalpui mek a ni a ti.
George Kurian chuan 1980 ah BJP ah ka inpe a kan khuaah 95% hi Christian kan ni a, tuman mak min ti lo va BJP chu anti-christian a ni an ti ve ngai lo Chuvangin BJP hi Anti-christian kan nilova, Politics a inbeihna mai a ni tih hi kan hriat angai a, BJP inghahna thurin chu integral humanism a ni a ni. Hmasawnna tluantling kan neih theih nan nangni pawh ṭawngṭai nun lo nei ula, BJP hian Mizoramah hmasawnna dik a thlen ve ngei ka beisei tlat a ni a ti bawk.
Inkhawm hmasa neih zawhah hian George Kurian chuan thuthar thehdarh tu te kawmna hun a nei bawk.
Extended State Executive Meeting ah hian BJP MLA te, MADC Chairman te leh MDC member te pawh an tel bawk a ni.