North East Region Missionary Retreat vawi 5-na chu ni 11-14 July 2024 hian Bawngkawn kohhranah neih mek a ni a, he hunah hian NE Region Mission Field 7 atangin thawktu mi 700 chuang leh an chhungte nen mi 1600 vel beisei an ni.

Missionary Retreat hi Synod Mission Board (SMB) in Missionary te intuaithar nan kum 3 danah Region hrang hranga thenin neih thin a ni a, Covid hri leng avangin kum 2020 leh 2021 khan hi neih a ni lo va, kum 2022 khan Home Mission North pualin Zemabawk Presbyterian Kohhran Biak inah neih a ni a, nikum khan Central Region tan Chaltlang Kohhran-ah neih a ni bawk.

Kuminah hian NE Region tan Bawngkawn Presbyterian Kohhran Biak inah buatsaih a ni leh ta a ni. He Retreat-ah hian Thupui atan “Chanchin Tha hril” (Matthaia 28 : 19 & 20) hman a ni a, Speaker bik awm lo in mi hran hranin an insawi chhawk dawn a ni.

Nimin (11.7.2024 (Ningani)) chhunah mikhual thleng turte in ziahluh hun hman a ni a, nimin chawhnu dar 3:30 thleng khan he retreat-a chhim tur missionary 512 in report an awm tawh a, riak lut tura in ziak lut 750 an tling tawh bawk.
Ningani zan atangin vantlang Pathian biak inkhawm neih tan nghal a ni bawk.

Zirtawpni (12.7.2024) nilengin Missionary leh an kawppuite tan paper zirho hun buatsaih a ni dawn a, rawngbawlna atana thil tul hrang hrangte zirho a ni ang.

Inrinni (13.7.2024) ni lengin testimony sawi leh fakna inkhawm a hun hman a ni ang a, Inrinni zan atanga Pathianni chawhnu thlengin retreat thupui “Chanchin Tha hril” tih thupui then hrang hrang ngaihthlak a ni bawk ang.

Kumin Retreat-ah hian Missionary thawklai boral ta mi 4-te sunna hun Pathianni chawhnuah hman a ni bawk ang.

He thu buatsaih lai thlenga Missionary in report tawh 512 niin, an rawn hruai an chhungte nena riak lut tura in report tawh zawng zawng 750 an tling tawh bawk.