T. Linda-i Siaha Vaihpi-II chu a pasal in kut a thlakna hliam tuar lovin Ningani tlai khan a boral a, tualthattua puh hi man a ni tawh a, hemi chungchangah hian Mizoram State Commission for Women chuan ningani khan Suo moto in thubuai an ziak lut.
State Commission for Women-in thubuai an ziah luh chungchang order an tih chhuaha an tarlan danin, Siaha Vaihpi-II-a cheng T. Linda chu a pasal Beihrualy chuan na takin kut a thlak a, a hliam tuar loin ningani tlai dar 4 khan an chenna in a boral a. He tualthihna chungchangah hian Siaha Police Station-ah Bharatya Nyaya Sanhita, 2023 hnuaiah tualthah (murder) thubuai ziah luh nghal a ni.
Thudawn danin, a nupui sawisa hlumtua puh Pu Beihrualy pawh hi Police te manin ningani khan Siaha District Jail-ah dah luh nghal a. A pasal kut tuara boral T. Linda-i ruang chu ningani khan postmortem a nih hnuah vuiliam nghal a ni.
Commission for Women chuan he tualthihna thleng hi hmeichhe zahawmna leh dikna chanvo tihbawrhbanna nasa tawpkhawk nia an ngaih thu leh suo moto cognizance lak ngei theihna tur nia an hriat avangin thubuai an ziah luh thu an tarlang a, Siaha Police Station Officer-in-Charge chu hnu chhuina kawnga an hmalak dan kimchang leh thlen chinte ni 20 ral hma ziaka hriattir tura an beisei thu leh Chargesheet pawh khawtlai hauh lova Court-a thehlut turin hnuchhuitute an beisei tih an tarlang.
Commission chuan Women & Child Development Director pawh Siaha District mipuiin hmeichhe humhimna Protection of Women From Domestic Violence Act, 2005 chungchang an hirat leh zual nana hma la tur leh an hmalak dan kimchang ni 30 chhunga Commission-ah thehlut tura an hriattir thu a tarlang.
State Commission for Women Chiarperson C. Lalchhandami hi chuan hmneichhe chunga hleileinna thleng chu commission in a do zel dawn tih leh pawikhawihtute chu dan anga na taka hrem an nih theih nan hma an lak zel tur thu a sawi.