- Ruata
India ram company lian leh hlun Tata atanga electric coupe SUV lo chhuak tur Tata Curvv EV chu India ram kawngpuiah kan hmu thuai dawn.
Tata hian an electric SUV tihchhuah tur puala mipuite rawn chhaih hmasakna, teaser hmasa ber an tichhuak tawh a. Hetah hian a ruangam tur a lang ruai ruai thei a ni. A concept ruangama kan lo hmuh tawh angin Tata Curvv hi a design leh thil dang hrang hrangah coupe design mawi tak a rawn ni dawn niin a lang a ni.
Curvv EV headlamp cluster leh DRL te hian Tata Nexon EV a rawn pawl viau a. Teaser atang hian he electric SUV thar tur hian hian alloy wheel design thar, mawi dangdai tak bakah connected taillamp design te a rawn nei dawn a, a rawng pawh Tata SUV dang ang bawkin duhthlan tur a rawn awm nual dawn a ni.
Tata’s Gen 2 Acti.ev platform nghahchhana duan Curvv EV hian a chhunglamah design mawlmang tak leh tunlaia an uar, minimalistic design language a rawn nei dawn a ni. A kentel zingah hian 10.25-inch digital driver’s display nei tura ngaih a ni a, hei bakah hian 360-degree camera blind spot monitoring a nei ang a, hmalam seat ventilated a ni dawn bawk.
A man to hoah panoramic sunroof kan hmuh hmel bawk a, a man tlawm hret ho chuan sunroof pangngai kan tih thin, single-pane unit kan hmu dawn bawk a ni.
Harrier leh Safari ang bawkin Tata Curvv EV lo chhuak tur hian ADAS (advanced driver assistance system) a nei maithei a. Hetah hian autonomous braking, lane keep assist, adaptive cruise control leh thil dang tam tak a awm dawn a ni. Four-spoke steering wheel Tata logo eng vat awmna bakah floating touchscreen infotainment system, leh central AC vent chu Harrier leh Safari neih ang a rawn tawm hmel bawk a ni. He Coupe SUV thar tur hian dual-tone black leh beige interior theme a nei dawn bawk a ni.
Tata Curvv EV electric khawl ken tel tur hi official-in tarlan a la ni lo a, hetihrual hian charge vawi khatah km 500 thleng a tlan theih beisei a ni.
Tata hian Curvv’s ICE (petrol leh diesel pangngai) version pawh tihchhuah an tum tih an lo tarlang tawh a, hei hi electric tihchhuah hnuah erawh a nih hmel a. Curvv hian Tata khawl thar, 1.2L turbo petrol (125PS/260NM) leh 1.5L diesel (115PS/260Nm) te a hman hmel bawk a ni. Transmission thlan tur zingah hian 6-speed manual leh 7-speed DCT a awm dawn a, CNG hmang pawh a chhuah a beiseiawm bawk a ni.