- Reuben Lalnunthara Hnamte
Mihring nun hi a ho zawnga ngaihtuah chuan ho tak a ni. Tui kan in a, kan zung chhuak leh a, chaw kan ei a, kan paihchhuak leh bawk a, engmah hi neih kan nei lo, kan lak luh pawh paihchhuah zel a ngai. I tuiin te, i chaweite kha i paihchhuah loh chuan i taksa tan chhiatna a ni mai. Zing kan tho a, nilengin a tul tul kan thawk a, zan a lo ni a, kan mu leh a, chutiang chu nitina kan hun hman dan a ni. Neih reng hi kan lo nei hlei nem; kan lakluh pawh paih leh zel a ngai a, pawisa pawh kan lalut a, hman leh zel a ngai tho a. In leh lo kan nei ve kan ti a, thenkhat phei chu khuarel chhiatna avang chhe leh mai te, vanduaina avang kangral ta te a lo ni leh a. A nei tha leh nei ropui in ti te lah Lirnghing leh chhiatna dang lo thleng thut thei lakah an thaw dep dep bawk. Sum ngah ngah te lah an sum avangin an rilru a hah bawk, hringnun hi hahna tur hlir em ni lo ni le?
Motor chhuak thar a piang neih theih te, rosum tam tak neihte hi ropuina emaw kan ti a, rilru hahna mai mai a ni. A accident palh te, engemaw chhiatna an tawk palh ang tih hlau reng rengin rilru a chawl lova, kan rosum lahin min ti thlamuang na hek lo. Nula leh tlangval inkara hmangaihna te hi a hlut tehlul nen thenkhat chuan chhiatnan an lo hmag bawk a. Tlangval ni se ngaihzawng lo kawp ten tun tawk lah bo lo, nula ni se First love 3, 4 lo nei tawk awm bawk. Ngaihzawng neih te chu thenkhat tan phurrit leh chhiatna bul a lo ni. Ngaihtuah chiang mang lovin Nupui/Pasal kan han innei ve ngawt a, enge kan ei ang a, eng chhungkua nge kan din ang tih lam ngaihtuah lek lovin. A then chu eizawnna mumal nei lovin an then an then a, nupui fanau chawm ngai nen an buai hle. Fa te rualawt reng rengin kan siam a, fa te hmakhua leh an thlarau lam nun lah kan ngaihsak hek lo. Hei hian mi dang tana mi tha lo tam tak a rawn hring chhuak a, zu ngawl vei leh Drugs ngawl vei an lo tam phah a, mi hnawksak tam tak an lo pun phah a ni.
“Mi a beiseina i lak bo chuan ramsa ah i siam tihna a ni.” Darnell G.Neistera chuan a lo ti a. Tunlaiah hian beiseina nei tawh lo mi beidawng hi an va tam em! Awmze neia an nun an hman miau loh avangin mi hlauhawm mite ti ralti leh tinatu an lo ni thin. Khawvela pawikhawih thin kan hriat tam berte, mahni intihlumte hi mi beidawng, nunin awmzia nei tawh lova inhria an ni thin. Chungkua I din a, fate ilo neih chuan I fate kha mi beidawng leh nun awmze neilo turin siam ngai suh. Lal Solomona chuan nupui 700 leh hmei 300 a nei a, a hunlaia khawvel nawmchenna tinreng a chen a, rosum a ngah a, a hausa em em a ni. Mahse, Solomona hian “ Ni hnuaia thitih tak zâwng zawngte chu ka hmu ta a; tin, ngai rawh, thil zâwng zâwng hi eng mah lo leh thil lothlawn mai a lo ni” (Thuhriltu 1:14) tih chiah hi a hmuhchhuah chu a ni. Hringnun hi Pathian tello chuan awmzia ava han nei tlem em! Nupui tam tak nei te, nula ,tlangval tam tak kawp thin te, rosum tam tak neih tuma hmanhlelte hian an hmuchhuah chu a tawpa beidawnna chiah a ni.
Mumbai ah khuan vawikhat chu Sap nula pakhat intihhlum tum a, tuifinriata zuanthlak tum hi Missionary tlangval pahnih hian an chhanchhuak hlauh mai a. Enge a intihlum tum chhan an zawh chuan “ America mi hausa tawntaw fanu ka ni a. Ka awh leh ka duh a piang ka nei thei a, thlawhna thlengin private jet thlengin ka nei. Ka duh apiang ka nei thei a, mahse, engmah a lo ni lo, awh ka nei tawh bawk silova, nun hi ka peih tawh lo”a ti a ni. Nichin lawka kan kawm mawlh mawlh te chawp leh chilhin accident leh engemaw vangin mual an liam thut a, nimin mai a kan hmuh rengte, vawiina mitthi lo ni ta mai te; hlimthla ang mai chauh kan lo ni em ni ang? Bible chuan “In nunna engenge ni? Chhum reilote lo langa ral leh ta mai thin ang hi a ni si a”(Jakoba.4:14) a lo ti si. Chu mi thlahlel reng reng chuan duhamna leh mawi leh mawilo pawh thlu lovin, reilote nawmna zawng hian kan phe suau suau mai zawng a nih hi.
Chuti a nih chuan Hringnun hian awmzia a nei lo em ni ang? Kan lo piang ve te hi awmze neilo a piang mai em ni kan lo nih le? Bible chuan “ Kan damchhung nite chhiar dan tur min zirtir ang che, finna thinlung kan neih phah hialna turin”(Sam.90:12) a ti a ni. Damchhung ni chhiar thiamlo te tan chuan khawvela nun hian awmzia a nei tlem em em mai a ni. Damchhung ni chhiar thiam tan erawh hringnun hi a hlu em em si a! Nung anga lang si thimek hi engzat tak awm ang I maw? Hringnun hi a nihna takah chuan hlimthla ang chauh a ni a sin. Damchhung ni chhiar dan thiamlo te tan phei chuan nun hian awmzia reng a nei si lo. Movies vela kan hmuh hmuhnawm taka lang tawp leh ta mai si ang hi kan ni a. Isua nena nun hmangtu te erawh he khawvelah pawh thlamuanna, thihna hneh theih loh nun neitu kan ni a. Isua neitute tan erawh chuan nun hi ava hlu si em!
Mahni nawmna tur leh lawmna chauh ngaihtuah tan chuan nun hian awmzia a nei tlem kher mai. Mahni ruihna tur bak ngaisak tawh lo, ruihna tur a neih theih dawn chuan pawisak engmah nei tawh lo an tam a ni. Heng mite hi an khawngaihthlak takzet. Ziaktu pakhat chuan “ Maryline Monroe I kha a khuma thi a an char hma khan a thi daih tawh a ni, a nun khan awmzia a nei tawh lo” a ti a ni. Dam reng alang si mitthi ang mai hi kan va tam dawn em! Tunlai thalai tamtak pawh hi nun awmze neilo an va tam sawt em! Damchhung ni I chhiarthiam theihna tur chuan – TUN hun kha i tan a hlu ber a ni. TUN hun– hian a nia khawvel hi kan hmanral dawn. Tunah khan i nun kha Isua nen hmang la, tunah khan thil tha ti rawh. Tunah khan sual kalsan la; i tun hun ah khan Isua hnaih zel ang che. Sam ziakah chuan “ kei a tan zawng Pathian hnaih hi a tha a ni” ( Sam.73:28)a ti a. Nitina Pathian I hnaih zel chuan I hringnun pawh awmze neiin I hmang ang.