Hachhek Constituency Development Committee (HCDC) chuan nimin khan thuchhuah siamin, Hachhek Constituency huam chhunga kan kawng dinhmun (Darlak to Tuidam) kan en hian a lungawithlak loh kan ti hle a. He kawng hi khawthlang fate tan a kawng pawimawh tak a nih avangin Mizoram sorkarin a ranglam a, a chhelaite min siamthat sak turin HCDC chuan Mizoram sorkar kan ngen tak meuh meuh a. July 2024 chhung ngei hian a tha lo laite min siamthat sak turin kan ngen a ni. Hemi hun chhung a hmalakna emaw siam that tumna a awm lo a nih chuan HCDC chuan a tul angin hma a la ang, tiin an thuchhuahah chuan an tarlang.
Tin, Hachhek Constituency huam chhung a PMJVK hnuaia Project hrang hrang thawh zawh tep tawh chu tunah hian sorkarin Contractor- te hnenah Bill-a pek theihloh avangin hna thawh zawh loh tam tak ala awm niin kan hria a. Hnathawh zawh a nih vat theih nan contractor-te hnenah hian an hnathawh phu tawkin Bill pe chhuak vat turin sorkar kan ngen tak meuh meuh a. Tunah hian PMJVK hnuaiah hian Crore 35 hman lohin a awm mek niin kan hria a ni, tiin an thuchhuahah chuan an tarlang bawk.
Heng kan ngenna te hi min ngaihpawimawhsak tur leh a tul anga hma min laksak turin Mizoram sorkar kan ngen a. Min ngaihpawimawhsak lo a nih chuan a tul angin HCDC chuan kan Constituency tan hma a la zel dawn a ni, tiin an thuchhuahah chuan an tarlang tel bawk.