Football club hrang hrang ten season thar atan inbuatsaihna ngawrh takin an nei a, club hrang hrang ten friendly match an khel hlawm. Inrinni a inkhelah Arsenal in Manchester United an hneh a, Liverpool an chak bawk. Arsenal leh Liverpool an chak lai hian EPL champion Manchester City chu a vawi hnih nan an tlawm thung.
- Arsenal 2-1 Manchester United
Premier League club lian pahnih Arsenal leh Manchester United te chu California a SoFi Stadium-ah an inhmachhawn a, Arsenal in 2-1 in hnehna an chang. Arsenal laka an tlawm tum hian Manchester United player thar Leny Yoro chuan hliam a tuar a, striker Rasmus Hojlund pawh hliam vangin lakchhuah a ni bawk. Gunners lakah an tlawm bakah an player pahnih an inhliam hi United tan chanchin chhe leh zual a ni.
Manchester United hian an elpui lian Arsenal lakah bul an tan tha a, goal an thun hma hle. Inkhel tan atanga minute 10-na lekah striker Rasmus Hojlund chuan hmahruaina goal a thun. Hojlund hian goal a thun atanga minute ruk hnu lekah hliam a tuar a, minute 16-naah lakchhuah niin Hannibal Mejbri a lut. Rasmus Hojlund awm loh hnuin United tlar hma an hriam zo tawk tawh lova, ball chang tam zawk ni mah se shot nei lem zawk an ni tawh.
Hma taka goal an chhuah hian Arsenal a chhaihkawlh a, an khel tha zui ta viau thung. Gabriel Jesus chuan minute 26-naah goal thunin an si phurh a sut. Goal lut a awm belh theih loh reng hnuin Gabriel Martinelli chuan minute 81-naah Arsenal chakna goal a thun a, United an hneh zui ta a ni.
Arsenal hian pre-season a match an neih hmasak berah AFC Bournemouth chu penalty shoot-out ah an lo hneh hram tawh a. United lakah tha zawka inlan in, 2-1 in hnehna an chang zui ta a ni.
- Liverpool chakpuitu Szoboszlai
Zirtawpni khan Liverpool chuan an manager thar Arne Slot hnuaia an match hmasa ber an khel a, Real Betis lakah Dominik Szoboszlai goal thun hmangin hnehna an chang.
Manager thar Slot hnuaia inkhel an hmachhawn hmasak ber tum hian Dominik Szoboszlai chuan minute 34-naah he inkhela goal awmchhun hi a thun a, 1-0 in an chak zui ta a ni.
- City an tlawm leh tawh
EPL Champion Manchester City chuan pre-season-a an match hnihna inrinni khan Yankee Stadium-ah an hmachhawn a, AC Milan hneh lovin an tlawm.
City hian AC Milan lakah goal an thun hmasa a, minute 19-na lekah Erling Haaland chuan hmahruaina goal a thun. Hma takah goal thun mah se chawlhlawk hmain goal hnih an chhuah a, hnufual zawk ni chungin chawlhlawk an hmang. AC Milan tan hian Lorenzo Colombo chuan minute 30-naah goal thunin an si phurh a sut a. Amah vek hian minute 34-naah an goal hnihna a thun zui leh bawk.
Inkhel hmuhnawm takah hian chawlhlawk hnu lamah pawh goal a lut leh thuai a, City tan James McAtee chuan minute 55-na lekah goal thunin an si phurh a sut. Team hnihte an inhnehtawk reng hnuin Marco Nasti chuan minute 78-naah AC Milan goal thumna a thun a, City lakah Serie A team lian AC Milan in 3-2 in hnehna an chang zui ta a ni.
City an tlawm lai hian London club lian Chelsea chu Celtic lakah 4-1 ngawtin an tlawm ve bawk.