Mizoram Pradesh Youth Congress Committee (MPYCC) chuan nimin khan District Institute of Education & Training (DIET) Principal leh thawktute chênna in (Quarter) tlawhin, ‘DIET quarter-a chêng tur ni lo Chief Minister Lalduhoma Campaigner a awm tih kan hmuchhuak,’ an ti a. Quarter hi DIET hotute kuta hlan tawh niin Staff-te chenna tura ruahman a ni a; Staff quarter indaih lohna a nasa hle a ni, tiin thuchhuah an siam.
MPYCC chuan thu zâwt fiahin; an thu zawhfiahna aṭanga a lan danin he Quarter-a awm hming tumtu hi Lalthansanga, ZPM Party-a nihna sâng tak PAC Member hial lo ni tawh leh tuna Adviser ni mek a ni a. An chhungkaw member zingah sorkar hnathawk emaw, DIET a thawk emaw sawi tur an awm lo tih an finfiah, an ti a. Mizoram Chief Minister ni mêk Lalduhoma sawipui leh awm tir anih thu an dawng bawk a ni, an ti.
Laltawnliana, President, MPYCC chuan ZPM te’n an sorkar hmaa an insawi ang ni lo, “Lal ngai lo lal a nâ, an lal a kha,” tih anga ro an rel leh ṭhin hi a pawi hle a. Rinawm hmel takin mipuiah an inzuar a, an hun a thleng ta maw tihah dâwt ringawt hmanga an kal hi an demawm tak zet a. Kalphungthar chêt dan avang hian Mizoram mipui te tan ZPM Party hi thlawp reng tlak an nih loh thu leh an chêt duh dan tam tak lo thlir ve zel turin mipuite ka chah a ni, a ti bawk.
Laltawnliana chuan a luah tûr ni lovin he Quarter an luah hi a pawi hle a, a rang thei ang bera inthiar chhuak turin MPYCC chuan kan ngen a. Hetianga Party mi uchuak taka induhsakna an kalpui hian Kalphungthar sorkar ṭhat lohzia a lantir chiang hleah kan ngai a. MPYCC chuan an chhuah leh chhuah loh hi kan enzui zel dawn a ni, a ti bawk.