Season thara inelna hrang hrangah Chanmari FC an chetha a, MPL leh I Day inelnaah an chak zel. MPL hmahruaitu Chanmari FC hian Zirtawpni khan an khingpui Sihphir Venghlun FC chu 2-1 in an hneh. Zirtawpnia inkhel dangah Ramhlun Athletics in SYS FC an hneh ve bawk.
- Chanmari FC an chak zawn
MPL 11-ah tlawm nei lova kaltluang mek Chanmari FC hi GIG Motors I Day Football Tournament 2024-ah pawh an chetha viau a, vawi hnih an chak zawn leh tawh. I Day tournament-a an khelh hmasak berah SYS FC an hneh a, an match hnihnaah Sihphir Venghlun FC an hneh zui leh.
MPL team thar Sihphir Venghlun FC hian MPL hmahruaitu Chanmari FC lakah bul an tan tha a, goal thun hmasa zawkah an tang. Inkhel tan atanga minute 11-naah Lalthanpuia chuan hmahruaina goal a thun. Hma takah goal an thun vangin phur viau mah se Chanmari FC nawr let an tuar lova, chawlhlawk hmain hnufual zawkah an tang hman.
An si phurh sut ngei tuma tan khawh Chanmari FC hian penalty an hlawhchhuak. Penalty an hlawhchhuah hi Lalnunzama chuan minute 22-naah goala-ah a chantir a, an si phurh a sut. An si phurh an sut hnuin Chanmari FC an khel tha zui viau a, goal pawh an thun thuai. An si phurh sutna goal an thun atanga minute 28-naah Lalnunzira chuan hma an hruai letna goal a thun a, 2-1 a hmahruai chungin chawlhlawk an hmang.
Chawlhlawk hnu lamah inkhel a hmuhnawm zui viau naa goal erawh a luh belh thei tawh lo. Inkhel hmuhnawm takah team hnih ten goal thun tum viau mah se an hlawhtling zo tawh lova, Chanmari FC chuan 2-1 a hnehna changin point thum an hmuh belh leh. Sihphir Venghlun FC an hneh tum hian Chanmari FC tana khel tha tak Vanlalremruata chu ‘Man of the Match’ ah thlan a ni.
- SYS FC an tlawm zawn
MPL an hmachhawn hmasak berah hmuhnawm taka inlan a, boruak nei nghal hat SYS FC tum a fuh lo zui zel a, MPL leh I Day lamah chak an harsat zui zel. Rawlthar team hmuhnawm SYS hi Chanmari FC laka an tlawm hnuin Ramhlun Athletic FC lakah an tlawm zui leh nghal.
SYS leh Ramhlun Athletic FC te inkhelah hi a hmuhnawm viau a, goal lut a tam a, goal pawh a lut hma hle. Rawlthar team hmuhnawm SYS FC in inkhel tan atanga minute hnihna lekah Stain Laltanfela hmangin hmahruaina goal a thun nghal. Hma taka goal an thun vangin phur viau mah se hma erawh an hruai rei lo viau thung. Goal an chhuah atanga minute thum hnu lekah Ramhlun Athletic FC tan Isak Vanlalpeka goal hmangin an si phurh an sut.
Goal khat ve ve an thun hnuin inkhel a hmuhnawm zui viau a, chawlhlawk hmain a khat mawi tawkin goal a lut. Minute 13-naah Felix Lalruatsanga chuan Ramhlun Athletic hmahruai letna goal a thun. Felix-a goal thun hnu hian Benjamin Lalnunpuia chuan minute 26-naah an goal thumna a thun a. Chawlhlawk dawn hnaih minute 38-naah Rechard Lalrempuia chuan penalty atangin RAFC goal lina a thun zui leh a, 4-1 hmahruai chungin chawlhlawk an hmang.
Chawlhlawk hnu lamah inkhel a hmuhnawm zui viau a, goal khat hmuh tur a awm belh leh. SYS tan C Lalduhawma chuan minute 64-naah goal thunin an si phurh a sut then. SYS hian an si phurh sut zawh tumin tan khawh nasa viau mah se goal dang an thun belh thei lova, tlawm zawkah an tang zui ta a ni. He inkhelah hian SYS FC an hneh theih nana thawhhlawk tak Isak Vanlalpeka chu ‘Man of the match’ ah thlan a ni.