Season tharah champion tumin Arsenal an inbuatsaih zel a, defender thar Riccardo Calafiori an lak luh hnuin midfielder lak an tum Mikel Merino chu mimal inremna an neihpui leh thei tawh.
Arsenal hian Euro 2024-a hming chher lian leh zual Mikel Merino hi an mual lai thuamchak turin lak an duh a. Real Sociedad atanga lakchhuah nan £25m an tawktarh a, Spanish club nen hian an indawr mek. Man leh mualah inrem tuma club pahnihte an indawr mek lai hian Arsenal hian Merino hi mimal inremna an neihpui fel tawh thung a, Real Sociedad nen inremna neih chiah an hmabak tawh. Arsenal hian Sociedad hnenah Merino lei nan £25m bakah pek belh an inhuam.
Euro 2024 quarter-final-ah Germany an hnehna goal thuntu Merino hi La Liga club lian Atletico Madrid leh Barcelona te pawhin lak tumin an ngaihven a. EPL ah a lo chetchhiat tawh vangin EPL lamah kir leh duhna lian tak a nei thung. Merino hian kum 2017-2018 chhung khan Newcastle United a zawm tawh a, Magpies-ah a hming a chher zo lo. St-James Park-ah kum khat chauh a awm hnuin Real Sociedad a zawm a, La Liga club-ah puitling zawka inlanin Spain tan a khel phak ta hial a ni.
Uiawm taka champion zo lo zawn tawh Arsenal hian season liam taah loan a an hawh David Raya chu a nghetin an la fel tawh a, Boglogna atangin defender lar thar Riccardo Calafiori an la lut fel tawh bawk. Midfielder lak tuma an hel mek Merino an hnaih viau tawh a, an tlarhma thuamchak turin Viktor Gyokeres leh Victor Osimhen te an thlithlai mek bawk. An player neihsa an hralh hmasa zet a nih loh chuan Gunners hian tun maiah chuan Viktor Gyokeres emaw Victor Osimhen emaw zawk zawk la turin sum an nei tawh rih lo thung niin tar lan a ni. Gunners hian player hralh tum nei nual bawk mah se lei tumtute nen inremna an la nei thei hlawm lo thung.