PHE minister Prof Lalnilawma’n tunhnaia Aizawl tui tlan, tlawng lui a nut nasat chhan chu tlawng hnaih tlangpanga lei awm te a min nasat vang a ni tih an hmuh chhuah thu a sawi.
He thu hi tunhnaia amah kawmtu thuthar thehdarhtu thenkhat hmaah a sawi a, PHE minister Prof Lalnilawma chuan tuihnaiah Aizawl tui tlan, tlawng lui a nut nasat thu leh a thlifim chhung a hau tak avangin tui pump chhuah a khaihlak phah nasa a, hei hian Aizawl ah tui harsatna a thlen phah a tih a sawi a, tui nut chhan hre chiang turin hma an la tih sawiin,” Hemi chungchang hi Chief Secretary ka sawipui bakah DC leh AMC lam hotute nen pawh sawiho a ni a, AMC lam hian leivung paih tur an ven nasat thu te min hrilh a, chhan dang awm thei a ni avangin Drone hmangin tlawng lui chhehvel hi thla kan la kual ta,’ a ti.
PHE minister chuan tui lakna Reiek kai atanga Muallungthu leh Darlung kai lam thla an lak kual thu a sawi a, Muallungthu ram chhung hmung hrang hrangah leimin a lo tam hle a, chu chu tui ti nu tu a ni tak ber thu sawi.
Prof Nitea chuan, tui nut chhan an zir chianna atanga an hmuh chhuah an data te chu tui nu ven theih na tur project lian tham deuh siam nan te pawh an la hmang tangkai theih dawn tih a sawi a, kan hmalakna hi tuna kan harsatna tawh mek sutkian nghal theihna ni lo mahse nakin zel atana la tangkai tur a ni, a ti a; hetianga tui nut chhan zirchianna hi department in an vawikhat neihna a nih thu a sawi bawk.
PHE minister Prof Lalnilawma chuan Cyclone Remal avanga tui lakna khawl chhiate chu siam that mek a nih thu a sawi a, khawl thenkhat Guwahati lama an thawn thlak te pawh kar leh velah chuan Mizoram a rawn thlen an beisei tawh thu a sawi a, Cyclone remal avanga an khawl tam tak a chhiat avangin June thla khan tui pump chhuah kawngah harsatna an tawk nasa hle a, nikhata tui an pump chhuah pawh maktaduai 15 vel chauh a nih thu a sawi a, tunah erawh tui pump chhuah a tam chho deuh tawh tih a sawi.
Chutihrual chuan ruah a surin lui tui a nut nasat thin avangin tui pump chhuah a khaihlak leh thin tih sawiin, tuna an harsatna ber chu tui nu a nih ber thu a sawi a ni.