Paris Olympic neih mekah Pathianni zan khan mipa Tennis final khelh a ni a, inkhel hmuhnawm takah Novak Djokovic chuan set hlohva Carlos Alcaraz hnehin Gold Medal a la. Olympic-ah a champion tak vangin Djokovic hian Golden Slam a puitlin a, Tennis GOAT a nihna a tichiang leh zual.
- Tennis zin kawng
A uar fal deuh ten ‘Khawvel mihring zinga fit ber’ an tih hial Djokovic hi May 22, 1987 khan Serbia-ah a piang a. Dijana leh Srdjan Djokovic te fa hming koh niin unau pathum a nei. Kum li mi lek a nih lai atangin tennis a hmelhriat tan a, kum ruk mi a nih laiin Yugoslav tennis player Jelena Genci hnuaiah Tennis a zir tan. Kum 2003 atangin profesional tennis a luh chilh a. Hetih hun lai hi Roger Federer leh Rafael Nadal te vanglai a nih vangin Djokovic hian hlawhtlinna a chang nghal mai lova, Federer leh Nadal te nen an vanglai a innan vangin ‘a vanduai mang e’ tiin a chanchin an sawi thin.
Player ropui pahnihin inelna lian an awpbeh karah Djokovic hi harsa takin a talchhuak a, kum 2008 khan Australian Open-ah a champion ve ta nawlh. Hetihlai hian mipa zingah Federer leh Nadal ni lo Grand Slam-a champion thei awmchhun a ni. Australian Open-ah a champion hnu hian a huangtau chho ta viau a, Grand Slam hrang hrangah a champion ta fo. Player ropui pahnih; Roger Federer leh Rafael Nadal te pawh a hneh thei ta riau a, World No. 1 te a rawn nih chhoh tak hial vangin Federer leh Nadal bakah player ropui dang pakhat a awm belh a. ‘Big Three’ tiin Federer, Nadal leh Djokovic te hi sawi thin an ni ta. Hun a kal zel a, French Open 2023 a zawh meuh chuan Djokjovic chu Federer leh Nadal te chungah chuangin Grand Slam-a champion ngun ber a ni ta hial.
- Zin kawng hautak
Mipa lamah Grand Slam-a champion ngun ber ni turin Novak Djokovic hian zin kawng hautak zet mai a zawh a, hliamin a tihbuai bakah Covid 19 hripui leng a tuar nasa em em bawk.
Pa luhlul ve tak Djokovic hian Covid 19 hri danna a la duh lo. Hri danna a lak loh vang hian a tuar zui hle nghe nghe. Covid 19 vaccine a lak loh vangin vawi kua zet a champion tawhna Australian Open khelh phalsak a ni lo va, Australia ramah kum thum chhung zin phalsak a ni lo hial bawk. Australian Open 2022 a hmachhawn theih loh laiin he hmunah amah la hneh ngai lotu Nadal a lo champion a, chu chu a zin kawng tihautak leh zualtuah a chang.
Australian Open a hmachhawn theih loh bakah champion lai a nihna Wimbledon 2021 chu thulh a ni ringawt a, US Open khelh phalsak a nih loh bawk vangin Nole hian Nadal-a ropuina French Open chiah hmachhawn tur a nei. Nadal-a ropuina hmunah a champion zo lo.
Kum 2022 khan French Open leh Wimbledon chiah a hmachhawn thei a. A champion na Wimbledon-ah Ranking point hmuh tur tihbo a nih vangin champion ber hi ranking-ah a tlahniam nghal duai. US-a inelna zawng zawng a hmachhawn theih loh bawk vangin ranking lamah a hniam zual zel. A hniam lutuk loh nan kum danga a khelh ngai loh inelna tenau te te khelin point a khawl keuh keuh a, kum khata chetha zual pariatte inelna ATP Finals khel turin a tling hram a, a champion zui ta hial bawk.
- Hlim ni kawl eng
Covid 19 vanga inelna lian tak tak a hmachhawn theih loh hnuin hripui a kiang a, khawvel intheh vengin Djokovic-a tan ngei pawh hlim ni kawl a lo eng ve leh ta.
ATP Finals 2022-ah champion in, he inelnaa champion ngun ber Roger Federer record a nih rual a, hun chhinchhiah tlak a tawng. ATP Finals-ah a champion hnuin thu lawmawm dangin a deng zui leh a, Australia sorkar thar chuan Djokovic an hremna hlipin Australian Open 2023 hmachhawn an phalsak. Australian Open 2023-ah a vawi 10 nan champion in Grand Slam-a Nadal champion zat a nih rual a. French Open-ah ropui taka champion zui lehin, Grand Slam-a champion ngun ber record a siam ta hial a ni.
Rilru paukhauh leh thiam bik ni bawk mah se a thinchhe lutuk hi inelna hrang hrangah a champion tam loh chhan a tling. ‘Thinchhe lutuk lo se Grand Slam-ah vawi 30 a champion tawh mai awm mang e’ tiin thhinchhiat vanga a champion tam loh thu sawi pawh an awm hial. Chuti taka thinchhia chuan Vana Pa entawnin zaidam a zir a, a rilru a puitling ve ta bawk nen a thin pawh a nel ve ta hle. Final boruak sang takah pawh a dawh thei a, a nghak peih a, ropuina a nghakchhuak thin. Vana Pa a entawn hi atan hlimna leh lawmna a ni.
Inelna hrang hrangah ropui viau mah se Olympic-ah a ropui hleithei lova, Bronze Medal chiah a la. Olympic-a a hun hnuhnungah khup hliamin a tibuai a, ngai a awh zan lo. Final-ah Wimbledon final-a a ngam loh em em Carlos Alcaraz a hmachhawn dawn bawk si a. An khelhna tur hi Clay a lo ni leh zel nen Nole hi Olympic Gold Medal la lovin a chawlh mai rinna lian tak a awm hman. Mah se, hlim ni kawl a eng nawn leh a, a champion lohna awmchhun Olympic-ah ngei a champion ta hlawl.
- Tennis GOAT Djokovic
World Cup 2022 ah Argentina an champion khan Lionel Messi-a’n ‘Football a thlengchhuak’ an ti a. Messi hian club leh ram tana trophy lak theih ang zawng zawng a la kim vek. Hei hian footballer ropui ber a nihzia a nemnghet. Olympic-ah Alcaraz hnehna a champion chiah khan Djokovic han Tennis a thlengchhuak a, mimal leh ram tana inelna lian zawng zawngah a champion kim vek. Tennis a GOAT chu Djokovic a ni a, Djokovic lo chu Tennis-ah la dang reng reng an awm lo.
Tennis ah hian inelna lian zual 15 a awm a, chungte chu; Grand Slam 4, Olympics 1, Tour Final 1 leh Masters 9 te an ni. Heng inelna zawngah zawngah hian Serbian pa huaisen Djokovic hi a champion kim vek. Olympic loh inelna lian dangah phei chuan Nole hi vawi hnih a tak a champion vek nghe nghe. Tennis-a a elpui lian Rafael Nadal hi Tour final-ah vawi khatmah a la champion lo teh tlat a. Hei bakah hian inelna lian dang Paris Masters leh Miami te a champion thei lo tluan bawk. Tennis ngainatute ngainat rawn, thiam an tih em em Roger Federer kha Olympics-ah a champion lova, Rome leh Monte Carlo-ah a champion thei lo tluan bawk.
Grand Slam-ah vawi 24 champion a, champion tam ber ni mek Djokovic hi Olympic-a a champion leh tak vangin Golden Slam a puitlin a. Golden Slam puitlin thei pangana niin Rafael Nadal, Serena Williams, Andre Agassi leh Steffi Graf te hnung a zui. Golden Slam hi Grand Slam inelna lian palia champion kim vek bakah Olympic-a champion sawina a niin Golden Slam puitlin theite hian ngaihhlut an hlawh hle.
Djokovic hi Grand Slam-a champion tam ber a ni a, inelna ngaihhluthlawh ATP Finals (Tour Final) ah champion tam ber a ni a, Trophy lian 71 zet a lak tawh bakah Olympic Gold Medal pakhat a la ta bawk. Mimal inelnaa ropui ber a nih bakah hian Serbia chu ATP Cup, Davis Cup leh Olympic-ah a champion pui tawh bawk a, hei hian Djokovic ropuizia a pholang chiang leh zual.
Inelna hrang hranga champion piaha ngaihhluthlawh em em, ropui tehna langsar tak pakhat chu AP Ranking a ni leh. Djokovic hi No. 1 ni chunga kum khar ngun ber (year end no 1) a ni a. Chawlhkar 428 teh meuh World No. 1 ni tawh bawkin, a sang fal hle nghe nghe.
Federer leh Nadal tantu i nih vangin Djokovic hi i ngei viau a ni mai thei. Carlos Alcaraz tantu i nih vangin Djokovic hi i fak hreh viau a ni thei bawk. Eng vang pawha huain, ngei hluah hluah pawh ni teh reng la Tennis-a a hnuhma hrang hrang atang hian Tennis GOAT a ni tih hi i pawm a ngai tho thung a. Djokovic lo chu lal dang reng an awm lo ve!