Nimina MNF party Hnam Run chhung inkhawmah MNF General Headquarters Adviser, R.Lalzirliana Ex- Minister chuan thu sawiin, ZPM sorkar chu anmahni party bakah anmahni thlang tlingtu neutral pawhin an beisei leh rin ang a nih loh thu a sawi. Campaign laiin sorkar hmasate zawng zawng aia chungnung turin an insawi a, politics field la dai ngai loten kan ram hi hruai chhin se tih duhna a len avangin, ram tana mi tling leh tlak tak takte pawh an tla zo rih a ni, a ti.
R.Lalzirliana chuan Home Minister tharin, ‘Thla khat chhunga Dan lova thil phurh zawng zawng kan ti tawp ang’ a tih kha, a sawi laia a hmel a en pawha a rin lohzia a sawi a. Langsar taka Kuhva phurh pawh vawiin thlenga tihtawp a la nih loh thu leh, Vairengte leh Bilkhawthlir tlangdunga kuhva chingtute an la buaizia thu sawiin, godown-a kuva an man sa an dah bo ta daih kha khawiah nge a awm ang tih sorkar a zawt a ni.
“Super Chief Minister atana an zawrh lai khan Kawnpuiah ZPM Chief Minister chuan portfolio a neih loh tur thu a sawiin, an Minister chak lo deuhte a dawmkan tur thu a sawi a, a ri chu a mawi khawp mai. Mahse, a hnuah ZONET interview-naah CM-in portfolio neih loh a theih loh thu sawi lehin, tunah department pawimawh tak tak 6 vel a enkawl leh si a. A portfolio chan Finance pawh hi a duhsak zawngte vohbik theih nan a in pe thlap a ni,” R.Lalzirliana chuan a ti.
R.Lalzirliana chuan CBI chungchang sawiin, ZPM hi an sorkar hma khan an sorkar chuan CBI general consent an pek tur thu an sawi a, an sorkar ta cheng a, CBI chhuitir tur chuan state sorkar phalna order a ngaih thu an chhuah leh si a, CBI chu an tana mi chimawm deuhte chauh chhuitir nan an hmang leh dawn si a ni tiin, CBI chungchangah MNF legal board leh MPCC Vice President-te thuchhuah chhanglet ngam loah ZPM a puh bawk.
Year of consolidation (inrenchem) sawi reng siin, Minister tlukpui 20 ngawt an neih thu te, Adviser to Chief Minister heti zat an neih thu leh Consultant an siam belh vak maite hi kan mithiam IAS, MCS etc. leh anmahni party ngeia mithiamte an rin zawh loh thu leh an inrenchem lohzia Zira chuan a sawi bawk.
MNF chhung inkhawm hi Lalthanliana Ex-MLA, Adviser, MNF General Headquarters chuan kaihruaiin, H.Lalrinawma Secretary, MNF General Headquarters chuan hunserh a hmang.