Chinland Government hruaitute leh ZO Re-Unification Organisation (ZORO) chuan inremna chungchangah nimin khan ZORO Pisapui Treasury Square Aizawl-ah meeting an nei a, meeting hi R. Sangkawia President ZORO in a kaihruai a, Chinland Government hi Pathanga Chief Minister Chinland Government in a ho a ni.
Myanmar Chin State-ah hian Chinland Government/Chinland Council leh Chin Brotherhood te chuan inhmuhthiam lohna neiin Silai an lek hial a, hei hi ZORO chuan tha ti lovin pawi a ti hle a. Unau vek kan ni a, in hmu thiam lo tur kan ni lova inlungrual taka awm tur kan nih avangin an inkarah remna palai hna a thawk mek a ni.
Nimin meetingah hian ZORO hruaitute chuan, “Unau kan ni a, inthen thei kan ni lo, indo thei pawh kan ni lo tihah hian kan chian a ngai hle a. Unau thlahkhat kan nih angin Pathianin engtika emaw chuan min la suihkhawm ang tih hi kan ring tlat a ni. Chuvangin unau indo hi a tha lova in inrem a ngai a ni,” an ti.
Chinland Government/Chinland Council hruaitute chuan, “Remna kawng zawha ZORO in hma in la hi tha kan ti hle a, keini Chinland Government/Chinland Council chuan kan unaute nen inbiak hi kan duh reng a, engtik lai pawhin Dawhkan kila inbiakna awm se kan duh dan a ni. Keini chuan u leh nau in kah hi tha kan ti lova, kan duh lo a, unau kan ni a, in ngeih tlang taka awm hi kan duh dan a ni.” an ti.
ZORO chuan Chinland Government/Chinland Council leh Chin Brotherhood te inkara inhmuhthiam lohna awm chungchangah an inrem theih nan hma a la zel dawn a. Hun remchang hmasa berah an inrem theih nan a hu hova inbiakna Dawhkan kilpui a tum a ni, tiin thuchhuah an siam.