GIG Motors I Day Football Tournament 2024 chu Thawhlehni khan RG Stadium-ah khelh chhunzawm a ni a, season kal mekah inelna liana tlawm la nei lo Chanmari FC chuan Bethlehem Vengthlang FC an sawp a, hnehna lian an chang leh ta. Thawhlehnia inkhel dangah Sihphir Venghlun FC chuan SYS FC an hneh ve bawk.
MPL hmahruaitu leh I Day football inelnaa vawi hnih chak zawn tawh Chanmari FC hian thawhtanni khan hnehna an chang zo lova, Ramhlun Athletic FC nen 2-2 in an inhnehtawk. Thawhtanniaah chak zo lo mah se Thawhlehnia an khingpui Bethlehem Vengthlang FC lakah awlsam takin hnehna an chang a, 5-0 ngawtin an chak.
Chanmari FC tan hian Vincent Lalduhawma chuan minute 31-naah hmahruaina goal a thun. Vincent-a hian minute 48 leh 72-ah goal thun zui lehin hattrick a siam. Vincent-a goal thum bakah hian CFC tan hian Moses Lalrinzuala leh Lalnunzama ten goal khat ve ve an thun bawk a, 5-0 ngawtin an khingpuite an sawp. Bethlehem Vengthlang FC tana hattrick siam Vincent Lalduhawma chu ‘Man of the Match’ ah thlan a ni.
Thawhlehlehnia inkhel hmasa zawkah Sihphir Venghlun FC chuan an khingpui SYS FC chu 2-0 in an hneh a, point thum an hmu.
MPL club thar pahnihte inkhelah hian goal a lut hma viau a, Sihphir Venghlun FC chuan chawlhlawk hmain goal hnih an thun hman. SV FC tan hian Malsawmtluanga chuan minute 21-naah hmahruaina goal a thun a. Chawlhlawk hma lawk minute 40-naah PC Lalruatsanga chuan SV FC goal hnihna a thun zui leh bawk a, chawlhlawk hmaa goal hnih an thun hi an chakpui zui ta a ni. He inkhelah hian Sihphirh Venghlun FC tana khel tha tak Lalmuansanga chu ‘Man of the Match’ ah thlan a ni.