London club West Ham United chuan season tharah chetthat tumin an squad an thuam chak zel a, Germany forward Niclas Fullkrug chu Borussia Dortmund atangin an la lut.
West Ham hian Dortmund striker Fullkrug lak luh nan £27m an seng a, hun rei tak daih contract an ziahpui. Hammers forward Fullkrug hi Euro 2024-ah khan forward tha a nihzia a langchiang leh zual a, Germany tlarhma tichaktu pawimawh tak a ni. Germany tan hian inelna hrang hrangah vawi 21 a khel a, goal 13 lai a thun tawh. Ram tan khel tam lo mah se goal erawh a thun thei viau thung.
EPL-a fiahna hautak zawk hmachhawn tur Fullkrug hian 2023 khan Werder Bremen atangin German club lian Borussia Dortmund a zawm. Dortmund tan season khat a khelh chhungin inelna hrang hrangah vawi 46 a khel a, goal 15 a thun. Dortmund tan a chetthat em vangin Germany a hmun pawimawh chang chho ta a ni. Club leh ram tan a chet that vangin club lian zawkin an hmutai a, West Ham United in an la lut zui ta a ni.
Season liam taah EPL-a pakuana West Ham hian nipui bazar inhawng mekah player panga an la lut tawh a, sum pawh an seng nual tawh. Fullkrug an lak luh hma hian Max Kilman (£40m), Dutch forward Crysencio Summerville (£25m), goalkeeper Wes Foderingham leh Brazilian winger Luis Guilherme (£25.5m) te an la lut tawh a. Manchester United full-back Aaron Wan-Bissaka lak tumin an dawr mek bawk.