Paris Olympic 2024 neih mekah football semi-final khelh zawh a ni a, final-ah inlen thlengtu France leh Spain an inhmachhawn dawn. France hian si an phurh hmasak zet hnuin Egypt an hneh let a. Inkhel dangah Spain chuan Morocco an lehthal ve bawk.
Inelna thlengtu France hian Semi-final-a an khingpui Egypt lakah si an phur hmasa a, an tlawm teuh hle nghe nghe. Hun pangngaiah chak zawk an awm theih loh hnuin extratime-ah tam zawk an nih hnuin France hian goal hnih an thun a, hnehna pawimawh tak an chang ta a ni.
France leh Egypt te hian inkhel hmuhnawm tak an lantir a, goal pawh a lut har hle. Darkar khat chuang zet goal lut a awm theih loh hnuin Egypt tan Mahmoud Saber chuan hmahruaina goal a thun. Goal thun hmasa zawk an nih vangin an phur a, an goal venhim tumin thapui an thawh nasa zui hle. Hun engemaw chen an hmahruaina humhim thei bawk mah se an him tlun thei ta bik lo thung. Goal thun mamawh France tan hian inelna neih mekah khel tha tak Jean-Philippe Mateta chuan goal thunin an si phurh a sut. 1-1 a nih hnuin hun pangngaiah goal thun belh thei an awm lo.
Hun pangngaiah chak zawk an awm theih loh hnuin inelna neih meka a vawi khat nan extratime khelh a ni. Extratime-ah hian Egypt an chesual thuai a, minute 92-na lekah Omar Fayed hnawhchhuah a ni. Tam zawk an nih vangin France an phur a, goal pawh an thun thuai. Tam zawk an nih hnuin France hian goal an thun thuai a, an si phurh sutna goal thuntu Mateta chuan minute 99-naah hma an hruai letna goal a thun.
Tlem zawk leh si phur zawk an nih vangin Egypt tan France nawr let a harsa a, an si phurh an sut thei tawh lo a ni mai lova, goal an chhuah belh ta hial zawk. EPL lama hming chher thar tak Michael Olise chuan minute 108-naah France goal thumna thunin an hmahruaina a tizau a. Egypt lakah 3-1 a hnehna changin final an lut a, France hian kum 40 hnu zetah football atangin medal an la ngei dawn tih a chiang zui nghal a ni.
Final-ah France hmachhawn tur Spain chuan semi-final-a an khingpui Morocco lakah si an phurh hmasak zet a, 2-1 a hnehna chang letin final an lut.
Olympic-a khel tha tluang tak Morocco tan hian Soufiane Rahimi chuan minute 37-naah penalty atangin hmahruaina goal a thun. He goal hmang hian hun rei tak chhung hma an hruai. Hnufual zawkah an tan reng hnuin Spain tan Fermín López chuan minute 65-naah goal thunin an si phurh a sut a. Hun tawp dawn hnaih minute 85-naah Juanlu Sanchez chuan Spain chakna goal a thun a, final an inhlangkai ta a ni.
Olympic football final hi zirtawp zan dar 9:30-ah khelh tan a ni dawn a, Parc des Princes-ah France leh Spain in Gold Medal an inchuh a. Spain hi Euro 2024 champion an ni a, France hnenah Gold Medal an la thei hlauh a nih chuan football-a par an chhuan lai a tih theih ngei ang.