Inrinni zan khan Olympic Basketball final khelh a ni a, champion tura rinkai USA chuan inelna thlengtu France an hneh a, Gold Medal an la. USA tana khel tha tak LeBron James chu Oympic MVP-ah thlan a ni.
Olympic Basketball-ah vawi li ngawt champion zawn tawh USA mipa team hi super star rual an ni a, champion leh tura rinkai ber an ni. Semi-final-ah Serbia an lehthal hram hnuin final-ah hian nuamsa zawkin hnehna an chang a, quarter thumnaah point hnihin an hnufual ve zeuh tih loh chu quarter dang pathumah chungnung zawkah an tang vek. An khingpuite hi 85-79 a hnehin an champion zui ta a ni.
France hneha Gold Medal an lak tum hian USA tan LeBron James chuan point 14 a thawkchhuak a, assist vawi 10 a neih bakah ball sawhlet vawi 6 a dawng tling bawk. A khelh that tluan em vangin Olympic a Basketball player tha berah thlan a ni nghe nghe. Basketballer ropui ber a nihna LeBron James hian a nemnghet chiang leh zual viaua ngaih a ni.