CYMA leh Mizoram Volleyball Association te tangkawpin an buatsaih LBS Suzuki 23rd Inter Branch YMA Volleyball Tournament 2024 chu khelh chhunzawm zel a ni a, champion lai Hunthar in quarter-final an lut. Inelna neih mek hi vawiinah khelh chhunzawm a ni ang a, hmeichhe quarter-final khelh tan a ni ang a, mipa lamah last 16 khelh zawh a ni ang.
Inrinni khan champion lai Hunthar chuan Sihphir an hmachhawn a, awlsam takin hnehna an chang. Hunthar hian Sihphir lakah harsatna an tawk lova, set thum an khelh chhungin awlsam pangngai takin an chak vek a, 25-18, 25-14, 25-16 a hnehna changin quarter-final an lut. Champion lai Hunthar rual hian pahnihna ni mek Khawhaiin hnehna an chang a. Chhinga Veng leh Muana Veng ten quarter-final an lut ve bawk.
Volleyball a boruak nei lian tak Khawhai hian Pool final-ah Tualcheng hnehtu Kanan an hmachhawn a, set hloh hmasa mah se harsatna lian tawk zui lovin hnehna an chang. Kanan hian Inter Village Volleyball champion Khawhai lakah tha zetin bul an tan a, awlsam pangngai takin set an la. Set an hloh hnuin Khawhai ropuizia a lang nawn leh a, an khingpuiten an chai hleithei meuh tawh lo. Set an lak let hnuin awlsam lehzualin set an la zawn a, 18-25, 25-17, 25-16, 25-12 a hnehna changin quarter-final an inhlangkai zui ta a ni.
Inelna neih mekah mipa lama boruak nei lian zinga mi Chhinga Veng chuan 25-15, 25-23, 18-25, 25-21 a Nursery hnehin quarter-final an lut a. Muana Veng pawhin 25-11, 25-17, 25-12 a Hmuifang sawpin quarter-final an lut ve bawk.
Mipa lamah vawiin hian last 16 khelh zawh a ni ang a, quarter-final lut a hriat kim ang. Vawiin hian mipa lamah inkhel pali a awm ang a, Court No. 1-ah Tuikual North leh Thentlang an intum hmasa ang a, Ruallung leh vawithum champion tawh Maubawk an intum zui ve leh ang.
Court No. 2-ah Hmunṭha leh Dinthar an inkhel hmasa ang a, Keiṭum leh Khawbel an intum zui ve leh ang.
Hmeichhe lamah vawiin hian quarter-final khelh a ni dawn a. Hethiang hi an intum dantur a ni:
1 Bungkawn vs Luangmual
2 Kanan vs Thenzawl Field Veng
3 Armed Veng South vs Durtlang
4 Kolasib Diakkawn vs Vaivakawn