Inrinni zan khan English Premier League season thar tan dawna khelh thin FA Community Shield khelh a ni a. Inkhel hmuhnawm takah EPL champion Manchester City chuan FA Cup champion Manchester United chu penalty shoot out-ah an hneh a, FA Community Shield an la.
Khelmual ropui Wembley Stadium-ah Manchester khaw club City leh United te an inhnehtawk viau a, goal pawh a lut har viau. Chak tumin team hnihte an inlan a, an player tha an awltir phal lo. City in an senior player thenkhat an awltir laiin United erawh chuan an player tha ber ber an luhtir thung a, Community Shield lak an duh tih hei hian a tichiang. City pawh hian an player pawimawh Kevin de Bruyne, Nathan Ake leh an player thar Matheus Nunes te bench atangin an luhtir leh bawk a, United lakah tlawm an tum bik lo viau.
Inkhel hmuhnawm takah hian goal lut har viau mah se hun tawp dawn hnaih goal hnih a lut a, inkhel hmuhnawm lehzual zawk an lantir. United tan hian Bruno Fernandes chuan mawi zetin goal a thun a, offside vangin a goal thun hi hnawl a ni thung. Hemi hnu lawk hian United in goal an thun ta nge nge. Fuh taka ball an inpek kual hnuin Alejandro Garnacho chuan minute 82-naah fuh takin a pet goal a, hmahruaina goal a thun. Hun tawp dawn hnaihah goal an chhuah vangin City hi FA Cup final-a an hneh loh United lakah an tlawm leh tura ngaih a ni hman.
Si an phurh hnuin City hian an si phurh sut ngei tumin tan an khawh zui nasa hle a, hun tawp dawn tepah an vannei ta nge nge. Minute 89-naah Bernardo Silva chuan fuh zetin a tauh goal a, an si phurh a sut. Silva goal thun hnu hian goal dang a luh belh tawh lova penalty shoot out hmangin chak zawk zawn chhunzawm an i.
Penalty-ah hian United tana pet hmasa ber Bruno Fernandes chuan awlsam takin a pet goal a, hetihlai hian City tana pet hmasa ber Bernardo Silva pet chu Onana-a’n a daksak thung. United hian 3-2 a hma an hruai laiin Jadan Sancho chuan a thelh tlat thung a, City in an nihrual theih phah. 6-6 a an in draw laiin United tana pet Jonny Evans chuan goal chungah a pet chhuak a, a thelh chiang hle. Evans-a’n a thelh hnu hian City tan defender Manuel Akanji a lo penchhuak a, Akanj hian inringtawk takin a pet goal a, City chakna goal a thun a, FA Community Shield an chawi zui ta a ni.
United hi hliamin a tibuai mek a, an defender thar Leny Yoro chu hliam vangin hun rei tak a chawlh a ngai dawn. Defender Yoro rual hian an forward Rasmus Hujlands chu hliam vangin a chawl mek bawk. Forward thar Joshua Zirkzee la lut tawh bawk mah se manager Erik ten Hag chuan Rashford a ring zawk rih a, Zirkzee a chhawr lo. Marcus Rashford hian Garnacho siamsak atangin goal thun theihna hun tha zet mai a nei naa uiawm takin a hlah tlat thung. Rashford hian goal thun ngat se penalty shoot-out hmanga chak zawk zawn a ngai kher lo ang.