Zirtawpni tlai khan Science Teachers Association Mizoram chuan an din champhaphak vawi 38na, Aijal Club ah an lawm a, School Education Minister Dr. Vanlalthlana, Patron, STAM in khuallian niin a hman pui.
Dr. R. Lalengmawia, President in he hun hi a kaihruai a, kalkhawmte lawmna thu sawiin inhmelhriattirna a nei a, Dr. Tawnenga, STAM Adviser in hunserh hmangin a tawngtai a. Zothanliana, General Secretary in STAM hmalakna lian zualte report a pe bawk. STAM Founder President Dr. H. Lalthlangliana’n ngaihnawm takin STAM din chhan leh thil tum te, Science leh Mathematics zirnain hma a lo sawn zel theihnan ngaihtuahna, tha leh zung an lo sen tawh dan te a sawi a. Kan state in Central University din anih theihnan hma an lo lak tawh dan te a tarlang bawk a ni.
Khuallian Dr. Vanlalthlana chuan Science leh Mathematics zirtirtu kan la indaih tawk loh thu a tarlang a, School tinah Science leh Mathematics zirtirtu data an neih fel thu leh hemi hmang hian zirtirtu siamrem ah nasa takin a pui dawn a ni, a ti.
School Education Minister chuan zirlai harsa te tanpuina atan STAM Educational Foundation din a ni chu tha a ti a, hemi pual hian cheng 5000/-(Sangnga) a pe a, tin, MLA Fund atangin Science zir duh, sum lama harsa te College admission senso zirlai pahnih (2) tan a pek tur thu a sawi a, STAM chu Implementing Agency niin hemi hmang tangkai tur hi an thlang dawn a ni. Dr. Vanlalthlana’n zirlai harsa te tan a thilpek avang hian STAM hruaitute an lawm hle a, lawmthu an sawi. NIT Mizoram chungchang sawiin Lengpui campus a din na tura thil tihfel ngai la awm te bawhzui zel a ni ang a ti. Pukpui, Lunglei a Engineering College tihpuitlin a nih theihnan Central lama a zuk thlen tawh dan te a tarlang a, umzui zel a nih tur thu sawiin, STAM chuan lawmawm a ti hle a, heng hma lakna te hi a hlawhtlin ngei pawh an beisei bawk.
Minister chuan Atal Tinkering Laboratory school hrang hrangah din belh zel a nih theihnan hma lak mek a nih thu a sawi a. STAM Patron ni bawk Dr. Vanlalthlana chuan hruaitu hmasa te inpekna avangin lawmthu a sawi a, Central University din a nih theihnan STAM hma lakna ropui a ti a, Patron a ruat anih vangin lawmthu a sawi bawk a ni.
STAM Rising Day lawmna ah Proficiency Award Donor te, Adviser te, Science NGO atangin MSS, MAS, MMS, GSM te sawm anni a, Environment humhalh lama an thawhpui MEFCOF leh zirlai pawl atangin MZP leh MSU te an sawm a ni a, STAM chuan hun hman pui tute hnenah lawmthu an sawi bawk.