- Mahmuaka Chhakchhuak
July 29, 2024 (Monday) ah khan Rev. F. Sangvela chu South Asia Theological College and Seminary chuan Honorary Doctorate Degree (Doctor of Ministry) hlanin a rual hian midang panga telin, chung mi panga zingah chuan Rev. R. Lalbiakliana, BCM General Secretary hi tel bawkin Bengaluru-ah urhsun taka hun hman a ni.
Rev. F. Sangvela hi kum 1948-ah khan Cherhlun khuaah lo piangin zirna lamah MA First Class-a pass a ni a, Mizo zinga MA First Class-a pass hi an bath tih lohah chuan mi pasarih emaw chiah an la awm nia sawi a niin anni bath mi pathumte hi a dawttu nia sawi a ni. MA a pass hnu lawkah hian an khua Cherhlunah chuan High School Headmaster-in a awm a, school-a a thawh chhung chanchin hi sawi tur tam tak a awm nain tuna tan chuan kan sawi vek hman rih lo ni mai se. Headmaster a nih lai hian kohna nasa tak dawngin lohtheihloha rawngbawl tura inbuatsaih a tul tak avangin kum 1978 May thla chuan Cherhlun High School chu chhuahsanin Yavatmal, Maharastra-a BD zir turin a kal a, a kal dawn zanah phei hi chuan mahni muthmun ve veah a pa nen an tap tlaivar a ni ber mai.
Nimahsela a kotu Pathian a rin ngamna avangin mittui nen an in chu chhuahsan mahsela malsawmna a dawng a, kum 1979-a First year an exam zo Cherhluna a hawng chu a nu leh pate chuan an thlawhhmaah thlai chi hrang hrang an chinte chu alo tha em em vek maiin zuva pawhin a lo ei sak lo a, Buh chu kawt 22 (kawt khat hi tin 4 a nih lai) lai tharin thlai rah lam pawh an thar tha a, La pawh rizai pathum daih tur lai an thar bawkin |in khat hmun lekah chuan malsawmna tam tak an dawng a. Cherhlun atanga Yavatmal kalkawng hi a thui viau mai; Cherhlun atangin kein ni khatah Hnathial an thleng a, Hnahthial atangin State Transport Bus-in Aizawl an thleng lehin Aizawl atangin Guwahati Bus-in an kal leh a, Guwahati atangin Train-in Nagpur an pan leh a, Nagpur atangin Bus bawkin Yavatmal hi an pan leh thin a ni.
BD a zir zawh hnuah chuan kum 1981 atangin Probationary Pastor atan lak a niin Thingsai bial tura ruat a ni a, Rev. K. Thanzauva Jorhat Eastern Theological College-a Lecturer hna thawk tura chhuak tur chu a thlakin kawrchung pawh nei loin kohhran enkawl hna chu a tan a. June thlaa Pro. Pastor nia bul atan chhoh hnu lawkin November thlaah apa chuan a boralsan mai chu a tuar hle mai. Nimahsela rawngbawl tura a penchhuah tawh tlat avangin amah hringtu ngei apa tawrhna aiin Kross-a Lal Isua tawrhna chu na zawkin a hria a, rawngbawlna tihbalhlah tum reng reng loin apa boral atanga chawlhkar hnihnaah ngei pawh chuan kohhran dan thianghlimin mi a kutsuih a, Pathian ropuina lantir turin a nun chu a inhlan mawlh mawlh reng a.
Pathian rawngbawl tura a inpeknaah hian kalsan tam tak a nei a, midang ang lo taka a kalsan pakhat chu Thingpui sen hi kum 1977 atangin a in tawh lo a, vawiin thleng hian ala in leh lo a, kum 46 lai a nghei ta. Hetianga Pathian rawngbawlna avanga a kalsan takte hi ama theihna leh chakna vang a ni hauh lo a, amah chuan ‘Pathian khawngaihna zarah thilsual tih chakna ka nei lo mai a ni zawk a, thingpui in chakna ngei pawh a awm tawh loh chuan in lo mai kha alo awlsam tawh a, chuvangin ka in lo mai a ni’ a ti mai thin. Hetiang taka Pathian tana a inhlan ngamna avang hian malsawmna pawh a dawng a, nupui a neih dawnah ngei pawh thlaraua piangthar tha mi, fanaute pawh Lalpa hnena hruai thei tur leh ka thlarau a chauh chang ni pawha min tanpui thei tur ngei ka neih a ngai a ni tiin a duhthlannate chu Pathian hnenah a hlan a. Chutiang mi tak tur chu pekin a awm a, a mi hriatchian leh khawtlang pawhin mi fel tia an sawi F. Lalthanzami (Zamtei) nen chuan kum 1981-ah an innei ta a.
Kum 1984-ah Evangelist Pastor (Evangelist at Large) atan ruat a ni a, kum 1985 June atanga 1988 Jun thla thleng Lawngtlai bialah Pastor-in a awm leh a, kum 1988 atang hian Boro Mission Field Director ni lehin kum 1990 Diphu khawpuia Union Christian English School (UCES)-ah Headmaster tura kohna dawng lehin thla reilote chhung a han awm a, Arunachal Pradesh lama rawngbawlna nei tura kal lehin rambuai avangin a lut thei lo leh a, chumi hnuah chuan June 28, 1991 chuan Phuaibuang biala kohhrante enkawl turin kohna a dawng leh ta a. Kum 1992 atanga 1994 thleng Aizawl South bial Pastor ni tura ruat a ni lehin he biala a awmlai hian M. Th (Missiology) a zir leh a. M. Th zir sawi takah chuan Pastor Sangchema nen hian Cherhlun chhuak ve ve niin an inpawl rual zel a, B.A (Hons) ah Political Science zir ve vein M.A-ah pawh Political Science la lehin First Class-ah an pass ve ve leh a, B. D zir leh ve vein pastor an ni leh a, Pastor Sangchema hian M. Th zir alo tum hmasain chumi kumah chuan zir tura a kal dawnin harsatna a nei leh thut a, a kum lehah Pastor Sangvela nen hian M. Th chu an zir rual leh a.
M. Th hi kum 1994 June thla atangin Union Biblical Seminary, Pune-ah zir tanin kum 1996 April thla thleng a zir a. A zir zawh hlim tein Mizoram |halai Kristian Pawl (MK|P) Secretary atan ruat a ni a, kum khat chiah (May 1996 – April 1997) chiah he chanvo a chelh lai hian Baptist Youth Fellowship of India (BYFI) ah Vice President a ni bawk a, amaherawhchu |halai Secretary lian nia rawngbawlna reilote a chelh hman tihin Tripura Mission Field Director turin a liam thla leh a. Kum 2001 October thla atangin Academy of Integrated Christian Studies (AICS) ah Lecturer tura ruat a ni leh a, chuta tang chuan kum 2004 ah AGS i/c Mission and Evangelism ah hlankai ni lehin kum 2010 – 2013 chhung Executive Secretary, Aizawlah awm lehin heta tang hian full time rawngbawlna ata chawlin an chhungkuain anmahni In ngeiah an cheng ta a. An chenna In ngei pawh hi Pathian pek liau liau a ni a, a pension hma ni chiah a an neih a ni nghe nghe.
A pension hnuah hian BCM President atan ruat leh a ni a, kum 2013 – 2014 chhung chelh lehin chuta tang chuan mawhphurhna nei chunga rawngbawlna nei tawh loin Pathian kohna apianga kal turin a inpe ta a. Lehkha ziaka rawngbawl hi a tuina a nih bawk avangin kohhran a enkawl lai atang tawhin a hun neih apiangin lehkha a ziak thin a. Kum 1981 atang khan lehkhabu siamin vawiin thleng hian bu 28 lai a chhuah tawh nghe nghe a, tunah hian lehkhabu buatsaih mek a nei bawk. Pensioner ni mahsela a rawngbawlna chu a chawl tak tak thei chuang lo a, kum 2014 atang hian vawiin thlengin rawngbawlna ala nei chhunzawm zel a, camping speaker atan leh khawmpui speaker atan sawmna ala dawng zel a. Tunah hian Chhimbial Chhantuah President a ni mek a, Lok Adalat ah Conciliator ni mek bawkin HPC-ah Member a ni bawk a, BSI Lunglei South Branch ah 2014 – 2024 chhung khan President ni bawkin Lunglei lama INTACH huikhawmtu ber a ni bawk. Official a nih chhungin ram hrang hrang sawm a tlawh hman a, England, Australia, Singapore, China, Vietnam, Cambodia, Nepal, Myanmar, Bangladesh, Bhutan, Andaman & Nichobar Is, Hengah hian thusawina hun a nei thei zel bawk.
Hetiang taka Pathian rawngbawl mi a nihna vang hian chawimawina pawh vawi tam tak a dawng tawh a, tuna SATS atanga Doctorate Degree a dawn pawh hi chawimawina ropui tak a niin Pathianin a chawimawina kan ti thei bawk ang.