GIG Motors I Day Football Tournament 2024 chu Thawhtani khan RG Stadium, Mualpui-ah Semifinal khelh a ni a, Mizoram Police FC leh Aizawl FC ten final an lut. Final hi August ni 15, Ningani zan dar 6:30-ah khelh a ni ang.
Semi-final-ah pahnihna ni chunga semi-final lut Mizoram Police FC chuan inelna hrang hranga khel tha tluang tak Chanmari FC an hmachhawn a, Malsawmfela goal hnih thun hmangin an hneh. MPFC hi season kal mekah Chanmari FC hneh thei hmasa ber an ni.
Semi-final hmasa zawkah hian MPL champion Mizoram Police FC in duhthusama thain bul an ta a, goal an thun hma hle. Inkhel tan atanga minute hnihna lekah forward tawnhriat ngah Malsawmfela chuan hmahruaina goal a thun nghal. Hma taka goal an thun vangin MPFC an phur a, inrintawkna sang tak nen an inlan zui theih phah. CFC hian an si phurh sut tumin tankhawh nasa viau mah se an hlawhtling mai thei lova, hnufual zawk ni chungin chawlhlawk an hmang.
Chawlhlawk hnu lamah Chanmari FC in bul an tan tha ve thung a, goal an thun ta thuai. Second half tan atanga minute thumna lekah CFC hian penalty an hlawhchhuak. He penalty hi Lalnunzama chuan awlsam takin a pet goal a, an si phurh a sut. Goal khat ve ve an thun hnuin inkhel a hmuhnawm zui viau a, Police team che fuh hmasa zawkah an tang leh. Goal hmahruai thuntu Malsawmfela chuan minute 69-naah hma an hruai nawn lehna goal a thun a, he goal hi final luh nan an chakpui zui ta a. Chanmari FC laka goal hnih thun Malsawmfela hi ‘Man of the Match’ ah thlan a ni.
Mizoram Police FC an chak hnu hian Aizawl FC chuan 4-1 in Ramhlun Athletic FC an hneh a, final an lut zui ve leh bawk.
MPL leh I Day inelnaah tlawm nei lova kaltluang mek Aizawl FC hian Ramhlun Athletic FC lakah beisei angin goal thun hmasa thei lo mah se chawlhlawk hnu lamah goal li ngawt an thun thung. AFC tan hian Samuel Lalmuanpuia chuan minute 55-naah hmahruaina goal a thun. Hmahruaina goal an thun hnuin AFC an khel tha leh zual a, a khat mawi tawkin goal an thun chho. Lalhriatpuia’n minute 67-naa goal a thun hnuin season kal meka goal thun thei tak Lalbiakdika chuan minute 79-naah AFC goal thumna a thun. RAFC tan Rechard Lalramnunpuia’ minute 90+2 naah an si phurh a sut then hnu lawkah Zomuansanga chuan Aizawl FC goal lina a thun zui leh zat a. I League club Aizawl FC hian 4-1 hnehna changin final an lut zui ta a ni.
Final a intum tur Aizawl FC leh Mizoram Police FC te hi group khata awmin an lo inhmachhawn tawh a, Aizawl FC in hnehna an lo chang tawh. Mizoram Police FC hian group match-a an hneh loh Aizawl FC lakah phuba lain champion ngei tumin tan an khawh dawn a, final hmuhnawm tak kan beisei thei ang.