London club lian Tottenham Hotspurs chuan season thar atan an squad an thuamchak a, England striker Dominic Solanke chu Bournemouth atangin an la lut.
Tottenham hian kum 26 mi Solanke manah £55m an thehchhuak phawt a, a khelh that dan a zirin £10m zet an pek belh thei dawn. Hetiang zat hi an pek belh leh a nih chuan Solanke lak nana an seng zawng zawng hi £65m a tling dawn tihna a ni. Man to taka an lei Solanke hi kum 2030 thleng daih contract an ziahpui.
Spurs player thar Solanke hi Chelsea pumchhuak a ni a, Chelsea Youth team-a a khelh laiin FA Youth Cup-ah vawihnih an champion nghe nghe. Chelsea-ah contract a hman zawh hnuin kum 2017 khan Liverpool a zawm a, Liverpool-ah a hming a chher lian zo lo. Kum 2019 khan AFC Bournemouth a zawm a, a chetha chho ta viau. Cherries tan hian inelna hrang hrangah vawi 216 a khel a, goal 77 a thun. Season liam ta khan a chetha lehzual a, inelna hrang hrangah vawi 42 khelin goal 21 lai a thun. Club lian zawk Tottenham tan a inlan zui leh dawn a, a club thar Tottenham tan inlan a, fiahna hmachhawn a chak tawh thu a sawi.
Solanke hian kum 2017 khan England Under 20 chu World Cup-ah a champion pui a, hemi tum hian goal li thunin Best Player-ah thlan a ni nghe nghe a. England senior team tan hian vawi khat a khel tawh bawk.