Supply Minister B Lalchhanzova’n Mamit district chhung khaw pathuma mi 85 te ration card atanga paih an nih chhan a sawi fiah a. Ration card atanga paih takte hi manual-a ration card siamsak an nih tur thu a sawi.
Thawhlehni khan a pisa-ah thu thar thehdarh thenkhatte’n an kawmnaah Supply Minister B Lalchhanzova chuan, Mamit district chhung Zomuantlang, Jampui leh Phuldungsei khuaa ration card atanga paih te chu chhungkaw 50 leh chhungkaw pum ni lo, mi 35 an nih thu sawiin, “He’ng mite hi sorkarin ration card atangin a paih lo va, Mizoram sorkarin ration card double te a zawn chhuah chak em avangin tuna an hmanraw hman, Ration Card Management System (RCMS) database in ration card nei kawpte hi a zawnchhuah tak avang hian Tripura-a aadhaar link tel te kha Mizoram database in a chhinchhiah thei ta lo va, chuvangin chuan hetiang hi a lo thleng ta a ni,” a ti.
B Lalchhanzova chuan, Tripura-a ration card leh family member system in a pawm theih lohte hi Mizoram lama awm leh an duh chuan engtik lai pawhin ration card an issue sak thei reng tih sawiin, “Anni ho hian Tripura lam ration card an neih hi an surrender mai hi a tha kan ti a. Mizoram sorkar chuan ramria awm kan mite hian ngaihsakin an mamawhnaah a tuamhlawm chho zel dawn a ni,” tiin, RCMS portal in hmun hnihah ration card neih a phal loh avangin Tripura-a an ration card awmna atangin an inpaih phawt a ngai ve dawn tih a sawi.
Zawhna chhangin Supply Minister chuan khaw pathum-a ration card chungchanga harsatna tawkte hian Tripura emaw, Mizoram emaw, an awm duh zawkna nei ang zawnga an ngaihtuah loh thu leh, Mizorama awm an duh zawkah an ngaih thu a sawiin, “An duhthlannaah a innghat a ni,” a ti.
He thil avanga political party thenkhatin politcs-a inbeihna’n an hmang a nih pawhin, ram tan a thatna tur a nih chuan a pawm theih thu a sawi bawk.