- Ruata
Royal Enfield chuan an lirthei zinga tuhnaia an hralh hnem ber te zinga mi Classic 350 chu kum 2024 model thar an phochhuak.
Classic 350 thar hi thla thar ni 1 ah lei theih turin an tlangzarh dawn a. An tlangzarh rual hian dealership hrang hrangah lei theih a ni ang a, Classic 350 tharah hian thil thar hrang hrang kan hmu dawn a ni.
Royal Enfield Classic 350 chhuak tharah hian an thil rawn ken tel thar zinga langsar tak pakhat chu all LED lighting system thar tur hi a ni dawn a. A light ho zawng zawng LED a ni vek dawn tihna a ni a, hei bakah hia type C USB charger an rawn dah tel dawn a. Gear position indicator, eng gear-ah nge a awm mek tih tarlanna a awm tawh dawn bawk a ni.
A kentel lamah hian semi digital instrument cluster a nei ang a, hetah hian analogue speedometer leh LCD screen tereuhte a tel dawn a ni.
A LCD screen-ah hian fuel gauge, odometer leh trip meter a awm ang a, tripper navigation pod a awm dawn bawk a ni.
Rawng duhthlan tur hi chi 11 lai a awm dawn a. Theme hrang hrang chi 5 awmin heng hnuaiah hian rawng chi hrang hrangte hi – Chrome, Matte, Halcyon, Signals leh Redditch te a awm a. Range hrang hrang – Madras Red, Jodhpur Blue, Emerald, Medallion Brown, Stealth leh Commando te a awm a ni.
A khawl lamah hi chuan inthlak a awm lem lo a. A hmaa miin hman ang bawk 349cc single cylinder air cooled khawl hmangin hei hian 20bhp power leh 27Nm torque a pechhuak thei a ni.
A man lamah chuan Rs. Nuai 1.93 atanga 2.2 man inkar a nih hmel a, hei erawh company lamin a puan chian hunah a zat chiah a la chiang turah ngai ila.