Deputy Chief Minister hlui Tawnluia chuan ration card var tana buhfai rate tihsan chungchangah ZPM ten thudik lo hmanga MNF an puh chu a ngaih thiam loh thu sawiin, MNF sorkar ministry hunlaia buhfai tihtona order copy a awm chuan Zoram mipui hmuhah pho chhuak turin a ti.
Zirtawpnia Mizo Hnam Run chhung inkhawmah thu sawiin, MNF NCC ni bawk Tawnluia chuan, ration card var a buhfai leina rate tihsan hi MNF sorkar laiin, Supply Department atanga rawtna chu Cabinet-in a ngaihtuahtu tur Sub-Committee a din tih sawiin, “Chairman ah Dy. Chief Minister dah niin, Vice Chairman-ah Supply Minister, Secretary-ah Supply Secretary, Member atan NGO aiawh te leh Consumer Affairs Committee aiawh leh sorkar official te ruat an ni,” a ti.
Committee in uluk taka a ngaihtuah hnuin tihpun turin recommend (rawtna) a siam lo tih sawiin Tawnluia chuan, “Cabinet ah pawh report pek luh a la ni lo va, inthlan puan in a zui ta a nih kha, MNF hunlaiin tihpun lohin vawiin ni thleng hian a kal a ni tih mi zawng zawng hriat a ni,” tia sawiin, October 2024 atanga ZPM sorkarin tihpun a tum avanga MNF an puhna chu thu belhchian dawllo a nih thu a sawi a. MNF sorkarin buhfai rate tihpunna order a siam chu rawn lek chhuak turin a phut.
ZPM sorkarin tun hnaia Phuldungsei (Zampui tlangdung)-a chhungkaw thenkhat ration card atanga an paih chu MNF chuan an pawm theih loh thu sawiin Tawnluia chuan, “Phuldungsei hi Mizoram state chhunga mi a ni a. MNF sorkarin ration card kan pe a, Village Council pawh kan pe a ni. Ration Card Management System (RCMS) ah verified & approved vek an ni,” a ti a, he’ng ration card hi ZPM sorkarin a paih chu hnam inpumkhatna atana pawi khawihna lian tak a nih thu leh Tripura-in an State-a rin luh an tum hi lak let leh a nih hma chu an bei dawn niin a sawi bawk.