August ni 15, Nilaini zan khan RG Stadium, Mualpuia GIG Motors I Day Football Tournament final khelh a ni a, inkhel hmuhnawm takah Mizoram Police FC an champion. Champion team hian lawmman cheng nuai khat leh trophy an dawng. Inelna neih zawh takah hian Mizoram Police FC tana khel tha thei tak Michael Lalbiaksanga chu ‘Best Player’ ah thlan a ni.
- MPFC in phuba an la
Final-a intum Aizawl FC leh Mizoram Police FC te hi group khatah an awm tlang a. Group match a an inhmachhawn tumin Mizoram Premier League (MPL 10) champion MPFC hi tlawm zawkah an tang. An intum hmasak tumin chak lo zawkah tang mah se inkhel pawimawh zawkah phuba an la a, 4-2 a hnehna changin an champion.
Final-ah hian boruak sang leh inkhe pawimawh a chetha thin Mizoram Police FC in team tha leh tlo an nihzia an lantir nawn leh. Aizawl FC lakah hian rin kai lo zawk an ni a, anni hi season kal mekah vawi hnih an hneh lo tawh. Final-ah erawh an khel tha ta viau thung a, chawlhlawk hmain goal thum ngawt an thun hman. Inkhel hmuhnawm takah hian Michael Lalbiaksanga chuan minute 22-naah hmahruaina goal a thun.
Aizawl FC lakah goal thun hmasa zawk an nih vangin MPFC an phur viau a, inrintawkna sang zawk nen an inlan zui ta chiah bawk. An khingpuite an talbuai laiin chhawr tangkaiin MPFC hian goal an thun belh zui leh thuai a, minute 29-na lekah goal hmahruai thuntu Michael-a chuan an goal hnihna a thun zui leh bawk a, an hmahruaina a tizau. Tarlan tawh angin Mizoram Police FC champion puitu Michael Lalbiaksanga hi Best Player-ah thlan a ni a, final-ah hian ‘man of the match’ ah thlan a ni bawk.
An khingpui lakah si hnih ngawt phur tawh mah se I League team Aizawl FC an insiamtha thei chuang lo va, chawlhlawk hmain goal an chhuah belh leh ta hial. Chawlhlawk dawn hnaih minute 43-naah FC Lalhmunmawia chuan MPFC goal thumna thunin an hmahruaina a tihzau belh a, 3-0 ngawta hmahruai chungin chawlhlawk an hmang.
Chawlhlawk hmaa si thum ngawt phur hman Aizawl FC hi chawlhlawk hnu lamah an insiamtha a, goal hnih an thun zawn. An si phurh sut ngei tuma tan khawh AFC tan hian Peter Lalrinhlua chuan minute 62-naah goal thunin an si phurh a sut then. He goal hian phurna thar a pe a, thatho zawkin an khingpuite an nawr chhunzawm. An phurna tisosang zual tur leh champion beiseina sang zawk nei thar leh turin Zomuansanga chuan minute 77-naah goal thunin an si phurh a sut then zui leh a, inkhel boruak a nung thar hle.
Aizawl FC in an si phurh sut tumin tan khawh zui viau mah se an hlawhtling zo tawh lova, hun tawp dawn hnaiah goal an chhuah belh leh. Mizoram Police FC champion na tichiang leh zual turin Isak Malsawmkima chuan minute 83-naah an goal lina a thun a, AFC nen an inkar a tizau nawn leh. Isak-a goal thun hnu hian goal dang a luh belh tawh lova, Mizoram Police FC chu I Day tournament champion an ni ta a ni.
Inelna neih zawh takah hian Aizawl FC tana goal 7 ngawt thuntu Lalbiakdika chu top-scorer a ni