August 22, Ningani khan LZ Juice MPL 11 Round 6 khelh chhunzawm a ni a, hmahruai mektu Chanmari FC chuan SYS FC lakah hnehna an chang am an hmahruaina an tizau. Ningania inkhel dangah Ramhlun Athletic FC chuan Chawnpui FC hnehin point thum an hmu ve bawk.
- CFC 2-1 SYS FC
MPL 11-ah tlawn nei lova kal tluang mek leh hmahruaitu ni mek bawk Chanmary FC chuan rawlthar team hmuhnawm SYS FC an hmachhawn a, inkhell hmuhnawm takah CFC hian Lalkhawpuimawia goal thun hmangin hnehna an chang. Ningani-ah hnehna an chan leh tak vangin AFC hian an hmahruaina an tizau a, season kal mekah tlawm an nei lo chhunzawm zel bawk.
I Day tournament-ah uiawm taka champion zo ta lo Chanmari FC hian SYS FC lakah duhthusama thain bul an tan a, goal an thun hma hle. Inkhel tan atanga minute 5-na lekah MS Dawngliana chuan hmahruaina goal a thun nghal. Hma takah goal an thun vangin an phur a, inrintawkna sang zawk nen rawlthar team SYS lakah an inlan zui theih phah. Hma takah goal thun mah se goal an thun belh mai thei lo thung a, chawlhlawk hmain goal an chhuah ta hial zawk. Chawlhlawk dawn hnaih minute 44-naah Joel Lalramengmawia chuan SYS tan goal thunin an si phurh a sut a, 1-1 inhnehtawk chungin chawlhlawk an hmang.
Chawlhlawk hnu lamah inkhel a hmuhnawm zui viau a, goal thun tuma an innawr tawn a hmuhnawm thei hle. An hun tha neih an hlah ve ve hnuin hun tawp dawn hnaih lamah Chanmari FC an che fuh nawn leh. Minute 70-naah Lalkhawpuimawia chuan CFC hma an hruai nawn lehna goal a thun. ‘Man of the match’ a thlan zui tak Lalkhawpuimawia goal thun hmangin Chanmari FC hian hnehna an chang a, point thum hlu tak an hmu. Chanmari FC in an hmahruaina an tihzau zel laiin MPL 11 a bul tan tha SYS FC an khelchhe tluang a, chak an harsat chhunzawm zel thung.
- RAFC an chak nuamsa
MPL 11 round 6-naa inkhel hmasa berah Ramhlun Athletic FC in champion hlui Chawnpui FC an hmachhawn a, 4-1 a chakin, hnehna nuamsa an chang.
Ramhlun Athletic FC leh Chawnpui FC te hian inhnehtawk takin bul an tan a, chawlhlawk hmain goal thun thei an awm lo. Chawlhlawk hmain goal lut thei lo mah se chawlhlawk hnu lamah goal a lut thuai a, goal nga ngawt hmuh tur a awm ta bawk. Inkhel hmuhnawm takah hian Isak Vanlalpeka chuan minute 48-naah hmahruaina goal a thun. Second half tan atanga minute thumna lekah goal an thun vangin RAFC an phur a, inrintawkna sang zawk nen an inlan chhunzawm.
Isak-a goal thun atanga munute 10-naah Felix Lalruatsanga chuan RAFC goal hnihna thunin an hmahruaina a tizau. Goal hnih chhuah zawn mahse Chawnpui FC a insiamtha thei chuang lo va, goal an chhuah zui leh. Hun tawp dawn hnaih minute 87-naah Benjamin Lalnunpuia chuan Ramhlun Athletic FC goal thumna a thun a, an chakna a nemnghet. Hun tawp dawn ruaiah goal an thun belh leh vangin RAFC hian hnehna an chang ngei dawn tih a chiang tawk viau tawh.
An chak ngei dawn tih chiang tawk viau tawh mah se RAFC in an duh tawk mai lo. Hun pek belh minute 90+4-ah Felix Lalruatsanga chuan an chakna tichiang lehzual turin an goal lina a thun. Man pf the Match a thlan zui tak Felix Lalruatsanga goal thun hnu lawk hian Chawnpui FC an chefuh a, J Lalruatsanga chuan minute 90+5-ah zangna dawmna goal a thun a, RAFC laka an mualpho lutuk tur a chhanhim. Hun tawp thlengin goal dang a luh belh thei tawh lova, Ramhlun Athletic FC chuan 4-1 in hnehna an chang zui ta a ni.