Mizoram Seventh Day Adventist hnuaia Womens Ministries huaihawtin inrinni khan Millenium Centre kawtah hleilenna tirem tura inzirtir tharna Ni hman a ni a. Women & Child Devlopment minister Lalrinpuii’n a hmanpui.
Minister chuan Mizoram, kan ram thenawm leh khawvel hmun dang dangah indona leh tharum thawhna, hleilenna chi hrang hrang a thlen mek bakah thihna thlen lem lo, mahni inchhung, hnathawhna hmun leh zirna inah hleilenna a thleng reng tih a sawi.
Mizoramah ngei pawh, a bikin hmeichhia, an hnathawhnaa an hotute atanga hleilennna tawk an awm fo a; zirlai zingah huaisen leh chak zawkin an aia naupang leh dawih zawk tih duhdah leh an hleilenna a tam em em tih a sawi bawk.
POCSO dan bawhchhiatna kan ngah tawh a, naupang hi aw nei lo, chhantu nei lo an ni fo thin tih Lalrinpuii hian sawiin, “Tharum thawhna hi a Kristian loin Pathian thu nen a inmil lo hle a. Bible-in mihring taksa chu Pathian in kan ni tih a sawi a, mahni’n kan tih thianghlim a tul ang bawkin midang thinlung leh taksa pawh kan zah a, kan ngaihhlut sak a tul hle,” a ti.
Tharum thawh leh hleilenna tuartute humna leh dan bawhchhiate hremna hrang hrang kan nei teuh tawh tih WCD minister hian a sawi a. Heng dan kengkawhtute hrang hrangte hian tharum thawh leh hleilenna tih bo tumin hma an la reng a. Hmeichhiate humhim turin Mizoram State Commission for Women pawh kan nei tawh a, hma an la reng chungin, nitin tharum thawhna a thleng reng tih a sawi a ni.
“Ruihtheih thil hi tharum thawhna leh hleilenna thlen tirtu pakhat a ni a, kan tih rem phawt chuan heng thil hi engemawchen a ziaawm phah ngei dawn a ni,” minister hian a ti.
Women & Child Development Department-a district programme officer (ICDS) Dr Lalhruaitluangi Chhangte chuan naupang leh hmeichhiate chunga tharum thawh leh hleilenna laka dan awmte sawifiahin, tanpui ngaiten an pan tur leh hma lak theih dan a sawi a. Mizoramah hmeichhiate chu eizawnna leh khawtlang nunah zalen takin lang mah se, hleilenna lakah an fihlim ta tihna a ni lo tih a sawi.
The Protection of Women from Domestic Violence Act 2005 hnuaia hleilenna in a huam – kut inthlak, tawngkama invau, rilru inhliam sak, sum leh pai hman kawnga inhrek beh leh mipat hmeichhiatna hman kawnga duh lo chunga tih luih ang chi a tel vek tih a sawi a. He dan hnuaiah hian a tuartu emaw midang emaw in thubuai an thehlut/ thehluh sak thei a. District tinah protection officer an awm a, an thawhpui – service provider an awm leh bawk a, women helpline – 181 ah engtik lai pawhin an biakpawh theih reng tih a sawi a ni.
Kut thlak tuar chhanchhuah ngai an awmin an chhanchhuak thei a, thubuai an thehluh sak thei a, councelling pek, awm lailawkna tur ngaihtuah sak, an hriat tur dan inhrilh leh mamawh dang pek leh ngaihtuah pui theih an ni tih te DPO hian a sawi.
Hleilenna tih remna tura inzirtir tharna Ni ah hian Aizawl Adventist Hospital medical director Dr Eileen Lalrinpuii leh Mizoram State Council for Child Welfare member C Luri te pawhin thu an sawi a. Thusawi kar lakah zaithiamten zaiin kalkhawmte an awi a, hleilenna tih bo a tul thua aurual a ni bawk.