Kum khat chhunga Grand Slam khelh hnuhnun ber US Open khelh mek a ni a, champion tura rinkai Jannik Sinner leh Carlos Alcaraz ten hnehna changin second round an lut. Sinner leh Alcaraz te an chak lai hian player langsar zinga mi Stefanos Tsitsipas erawh first round paltlang zo lovin a tla ve thung.
Tunlaia boruak nei lian tak world No. 1 Jannik Sinner hian American Mackenzie McDonald hmachhawnin bul a tan a, bul a tan tha lo. Tualchhung tlangval lakah hian chhe zetin bul a tan a, set khatnaah game hnih bak a la thei lo. Damdawi hman phal loh a hmang tih hriatchhuah a nih vanga sum chawitir Sinner hi boruak rit takin a delh a, US Open-ah beisei angin bul a tan tha lo. Chiang zetin set khatna hloh bawk mah sa a insiamtha thuai a, set hnihnaah break a nei zawn a, game hnih hloh chungin set a la let.
Set hnihna a lak hnuin set thumnaah a khel tha lehzual a, a khingpui hian game khat bak a la thei lo. Set hnih a lak zawn hnuin a khel tha chhunzawm a, awlsam taka set lak belh lehin Mackenzie McDonald lakah hian 2-6 6-2 6-1 6-2 a hnehna changin second round a lut.
Australian Open champion Jannik Sinner ang thoin Wimbledon champion Carlos Alcaraz pawhin set khat hloh chungin hnehna a chang ve bawk. Grand Slam-ah vawi li ngawt champion tawh Alcaraz hian Australian qualifier Li Tu a hmachhawn. A khingpui nen hian ranking-ah inthlau viau mah se beisei angin a khel ropui thei bik lo. Alcaraz hian awlsam taka set khatna a lak hnuin set hnihnaah a chesual a, a service a hum zo lo zeuh. Set hnihna a hloh hnuin set hnuhnung pahnih a la zui leh a, 6-2 4-6 6-3 6-1 a hnehna changin second round a lut.
Player tha pahnih; naupang te ni chunga Grand Slam-a champion tawh ve ve Jannik Sinner leh Carlos Alcaraz te hi an chak zel a nih chuan semi-final-ah an inhmachhawn thei dawn a. Semi-final-ah an inhmachhawn a nih ngat chuan inkhel hmuhnawm tak a nih ngei a rinawm.
- Tsitsipas a tla
Jannik Sinner leh Carlos Alcaraz ten second round an luh laiin Greek tlangval Stefanos Tsitsipas chuan US Open-ah harsatna a tawk chhunzawm a, chet that a harsatna mualah second lut zo lovin a tla. Grand Slam final vawi hnih khel tawh Tsitsipas hian Australian world number 86 Kokkinakis a hmachhawn a, set khat la ve bawk mah se Kokkinakis hian 7-6 (7-5) 4-6 6-3 7-5 in hnehna a chang a, inlehthalna lian a thlentir. Player langsar Tsitsipas hian US Open-ah third round a la paltlang ngai lo.
Nilaini a inkhel dangah Dan Evans leh Karen Khachanov ten inkhel hmuhnawm an lantir a, darkar nga chuang zet an inkhel. Darkar nga leh minute 35 chhung zet an inkhel chhungin Britain hian 6-7 (6-8) 7-6 (7-2) 7-6 (7-4) 4-6 6-4 in hnehna a chang. US Open first round a inkhel rei berah hian Evans hi a tlawm teuh hle a, deciding set ah 0-4 ngawtin a hnufual hman. Tlawm ngei tura ngaih ni hman mah se huaisen leh tlo takin a inlan a, a khingpui lehthalin hnehna lian a chang zui ta a ni.