- K. Hmingthankaia
Mizoramin eirawngbawlna Gas kan hmantirh vel lam kha chu, hun liam hnu, thawnthu ngaihnawm tak leh lunglenthlak tak angzawng zawka la sawiah khek ta rih ila.
GAS SEM HMANHMAWH: Vengchhunga point neia sem a nih hnu pawh hian, chanloh hlau reng reng nen, kawng chep tak kara sem ni bawk nen, a semtu lam hmanhmawh bawk, kan innawr rum rum a, engtikah nge an rawn sem leh dawn kan hre silo, gas buk tlinglo leh leak te pawh kan duhtui hleithei thin lo a nih kha ti’ru.
Chutah, hun rei tak home delivery-a sem thlap thlap anga hnunpui lama an lo inhriattir tawh vang emawni leh, chu chu hmunpui lamin an hriatchhuah vang emawni, home delivery ang deuh roh, a tak tak ni silo, home delivery ang thei ber tur, home delivery lem lem min han tihtir leh a, Aizawla Distributorte kudam atanga phurchhuaktu, Town trip driver guided na hnuaiah, phone message velah khan rei tak tak kha kan han buai leh ta thin a. Chutiang kara kan lak theih chhun chu duhtui a har tawh thin a ni e. A leak a lo awm leh, driver ten an han hawlh phit sawk sawka, a hlimchhawn chuan a ziaawm ve mai bawka,. Khatiang valve chhe tawh kha chu, an hawlh hma leh hawlh hnuin engzat tak riral ang maw? Veng thenkhatah chuan Veng hrauitute enpui leh kaihhruaiin, felfai taka la thin chu an awm awm e.
CYLINDER: A hriaten an sawi danin, Gas cylinder hi hman rei hun chhung, valid period neia siam a ni a. A nun hun chhung chu amah cylinderah hian a inziak a ni. Kum khata thla 12 hi ABCD-ah thenin, 15 B tih a inziah chuan, 2015 April-June chhunga enfiah thata, a bur a him em? a valve thlak a ngai em? tih vel check a, rawngte hnawih thara, ziah ngaite ziahthat leh tur a ni. Mizoramin gas kan hmantirh lai vela a hmunpui atanga zuk phur thin ka thianpa chuan, ” A bur ruak kan phurhthlak hi lo endik tur an awma, valid tawp ho chu an lo la hrang zung zung zel” a ti. Engatinge tunah hian valid tawp tawh leh valve leak tawh hi a tam em em?
GAS BUK TLINGLO: Ka thianpa sawi dan chuan, gas cylindera zuk thuntu khawlin a zuk nawrluh fuh loh deuh, gas thun tlem deuhte chu a awm ve zeuh zeuh. Chutiang chu a khawihtu labour ho chuan an hre em ema, cheng za te kan pe a, chutiang chu an load tel ngai lo, a ti. A thun zat tur khawlin a thun zat zata, Company, IOC lam atang chuan an ti tlinglo thei lo. Mizorama Distributorte lahin an lo sawngbawl kual vel a rinawm loh. Chuti chu tute nge gas buk tlinglo min leitir thintu? A hmunpui, Borkhola atanga zuk phurtu Driverte an ni.
Mizorama distributors zing ami, Mizofed Manager ka ti ti pui chuan, ” A lo thlen hlim hian 30? hi lo buk tur kan ni a’ a ti. A buk tur a chunglangah a tling tling an dah mai lo maw? ka tih chuan, ‘ A hnuai deuh leh kil deuh ami pawh kan la thin’ a ti. A tlinglo in hmuhin engtinnge in tih, ka tih chuan, ” Khulam atanga tlinglo a ni an ti tlat zel’ a ti leh mai. Gas bur valid pel tawh leh leak tam tak hi driver hoin kawng laka an lakchhuah nan a rem rem an hman thin vang a ni thei angem? ka tih chuan, ‘ Khulam atanga min pek dan an ti zel’ a ti.
ENGTIA TIHREH TUR NGE: IOC hmun Borkhola atanga zuk phur tur, Carrying Contractor hran an awm a. Driver hi chung ho chhawr chu an ni. Driver ruk ru lai hi kan inveng seng dawn lo. Chhungtin hian gas buk tlinglo leh leak nasa ho hi la duh lo theuh ila, distributorah let leh zel sela, distributor lamin contractor lamah thlen leh bawk sela, Contractor buai nak sela, driver chungah action la zel sela, kan ziaawm phah i ring em? ka tih chuan, Consummer Union lam mi pakhat chuan, ” A leak leh tlinglo la duh tho leh, blacka zuar ho hnenah tihralna an hre zel tho a, a buaithlak khawp mai” a ti. A dik viau rualin, hetia lak duh lova, kan kir kual zel hi kan tihtur leh tih theih awmchhun chu a ni hrih mai a nih hi.
HOME DELIVERY: Tunah phei chuan home delivery ti Veng engemawzat kan lo awm ta. Muangmarin a buk tlinglo leh leak chu kan hnawl thei ta. Hetia fair taka i tih vang hian gas dawn loh mai hlau suh. Dan ang thlapa online-a gas i book khan, dan ang thlapa dik taka an rawn pek dawn thu che i dawng thlap. I chan tur a bo thiang lo. Leak leh tlinglo tam lutuk vanga vawiin ami i changlo a nih pawhin, a dawtleh hmasa ber ami i chang tur a ni. Chu chu i chanpual, i dikna, Consumer Right a ni. Harsatna i neih chuan, phur taka nangmah pui tur chein, Consumer Union leh Pu Lunghnema, Charity Lodge te an awm reng e.
KEIMAH: Home delivery ti Veng, Venghluia awm ka ni. Home delivery tih hnua gas buk tling tha ka lak hnu hian, kan hman dan ngai renga hmang chungin, tunah chuan a hma aia ni 7-10 vel kan hmang rei ta. Manhla tak a ni. Gas burah khan, (Chhungkaw tam zawkin eirawngbawl nana kan hmanah hian)a valid chhung, a gas bur ruak rih zawng, a gas tak rih zawngte a inziak vek a. A gas tak rih zawng chu kg.14.2 a ni vek anga, a gas bur rih zawng chu a inanglo thluah ang. Kg.15 tanga 16, 17 thlengin a awm thei ang, a chiah chiah a inziak vek. Chumi belhkhawm, Gross wt. pawh a inziak bawk. Lo buk ve rawh. Kei chu kg.27 chin hi chu ka ngaidam mai, a hma ai chuan hlawk tak a ni tho.
TLANGKAWMNA: Tuna Mualkhang Bottling Plant siam len thar an tum hi kan hman hunah driver ho chu kan veng hneh thei deuh mai lawng maw? ka ti a, Mizofef Manager chuan,” A hmaa kan hman lai pawh khan kan inman nasat tho kha maw le’ a ti. Chuvangin, driver ho something lai hi kan veng seng dawn chuang lova, heti hian i ti mai ang u hmiang- Driver te hi nupui fanau enkawl ve tho te an ni hlawm si a, an hlawh a tlem bawk si a, tunlaiah mihring mamawh a sang tawh si a, midangte ang bawka hetia side income an lo siam ve hi tha te tein kan enliam mai dawn nge, gas hi kan buk zat zat anga, a tlinglo chu kan kir zel dawn?